你講我聽.我寫你看

我老婆教我追女仔

我老婆教我追女仔(一)

講故佬 我老婆教我追女仔

講故佬 我老婆教我追女仔

注意:此文章排除於CC BY-SA 4.0條款以外,版權歸原作者(羊先生)所有。
未經作者同意,任何人不得冒名、修改、重製、剽竊、抄襲、仿作、轉載文章至其他地方。

序章
各位好,我叫陳洛鋒,現就讀於浸大BBA-Accounting的Year 1。尷尬的說一句,我到目前為止的戀愛經驗為零。或者你會說是因為我毒矮柒肥,但其實我自問五官端正,身形標準,社交生活正常,幽默風趣,而且心地善良,但不知為何就是無法交到女朋友……
我也曾在中四時喜歡過一個從小相識的女孩,還向她表白了,結果是被狠狠拒絕了,理由是她現在不想拍拖。但在數天之後我就看到她和男友手牽手逛街,臉上洋溢著甜蜜的笑容,看得我心也碎了……媽媽說得對﹕「越漂亮的女孩越會騙人」(張無忌按﹕那是我媽說的好不好!)怎樣也好,我終於知道甚麼叫初戀難忘,初次心痛了……

我的中一至中五,都是在和尚寺就讀的(我可以切J發誓,如果給我再選一次,我一定一定會選男女校!)。雖然這五年我認識了一班基味甚濃的好兄弟(當然只是好兄弟而已,難道你還以為我們會玩甚麼斷背山嗎? ),但我還是很期待可以牽著心愛女孩的手。終於,會考完結了,轉校的機會也來臨了。

不負所望,我終於轉到了一間男女校。雖然預科的同學人數比較少,但有質素的女同學還是有數位的。我在努力讀書的同時,亦同時努力向其中一位表示我的好感,可惜事與願違,我還是遭到拒絕。
天呀!我到底哪裏不好? 自問樣子也不算醜陋!我媽還經常讚我帥!為何沒有女孩子喜歡我啊? !
我看著身旁的男同學有美相伴,閒時口沫橫飛的討論性經驗;而我則只能以書本為伴,閒時就上高登、香討等吹噓性經驗,不禁令我悲從中來,欲哭無淚……
終於,孤獨的預科生活也結束了,我拿著手上的成績單,考慮著JUPAS的大學排位。
『唔…排邊個先好呢? 』我一邊看著自己的成績,一邊與不同學科歷屆收生成績的參考資料作比較。
『中大同港大就一定無我份喇,可以唔駛諗。』做夢也沒想過可以進中大港大,我馬上將中大和港大的選擇刪去。
『嶺南山旮旯咁遠唔駛諗啦!』距離太遠當然不用考慮,又將嶺南的刪去。
『唔…雖然聽聞UST個BBA係最好嘅,但係又聽聞裏面無乜女喎,即係和尚寺? 刪!』囡囡多寡也是我其中一個考慮因素。
『呀樂就話Poly啲女最靚最潮,Raymond就推薦BU,話靚得嚟又大方得體,但軒仔話City嘅都唔弱喎,夠哂青春活力!』當然囡囡的質素也是十分重要的。
最後我將Poly排在首位,畢竟Poly的名氣比起另外兩間大。
而結果是,我竟然被Poly拒諸門外。

第一章
「呢位同學,你係讀邊科㗎? 」剛進校門就被一個男生攔住。
「er…我係讀BBA-Account 㗎。」
「哦,咁你上完呢條樓梯去到平台之後,望向左手邊,再上一條樓梯,嗰度就係BBA同學集合嘅地方啦。」男生親切的道。
「唔該……」可以的話還是想由一個美女帶路。
我按著他的指示走到集合處,已經看到為數不少的人在活動。我看到了Account的集合地點,但我還是向身旁一個走過的美女問路。
「唔…唔好意思呀,請問你Account喺邊度集合呀? 」我故作斯文的問道。
「哦!你係今年freshman呀? 跟我嚟啦!」美女轉身帶我走向集合處。
「係呢,我叫Karen呀,我係今年Account Soc嘅莊員,一陣會由我哋Year2帶你哋做orientation。」Karen邊走邊說。
「我叫做Samuel呀,你叫我做呀Sam得㗎啦。」我偷偷打量了一下Karen,嘩!乖乖不得了!要樣貌有樣貌,要身材有身材,還要穿著背心熱褲,露出一大截白滑長腿!噢!鼻血差一點就要流出來了……
『嘩!求其路過一個靚女都係Account Soc嘅,睇嚟我食屎食著豆喎,唔中Poly嚟咗BU都唔錯吖!』我嘿嘿淫笑,期待著三年大學生活中源源不絕的豔遇。
「呢度就係啦,你去同嗰位同學點名就得啦。」Karen指著前面一位穿著Account Soc T,高高大大的男生。
「唔該你呀師姐!咁…我哋係咪一陣會再見㗎? 」我依依不捨。
Karen笑著點點頭﹕「係呀,一陣見啦,拜。」說罷就離開了。
我看著師姐的背影,充滿盼望……『有機會嚟個姊弟戀都真係不枉此生喎…』
我收拾心情,走到那位男生面前點名。
「你好呀!係咪Account嘅新同學? 」高大男生開朗道。
「係呀!多多指教喎師兄!」我要微微抬頭才看到他正面,發現他高大俊朗,屬於陽光型男孩。
『嘩!有無咁屈機呀? 男嘅型,女嘅索!唔通我哋Account真係咁強? 』
「你個名係……」師兄看著人名表。
「我叫做陳洛鋒,叫我Samuel或者呀Sam得啦~」輸人唔輸陣,我挺起胸膛,充滿自信的道。
「ok,Sam,有啲新同學都到咗㗎啦,你可以同佢哋認識下先。」師兄指了指旁邊,那裏分別站了數個男女。「一陣差唔多齊人會叫你哋啦。」
我看了看我將來的同學,暫時男生比較多,女生只有聊聊數個,而且質素只屬一般。我走到女生堆,簡單的打了聲招呼,介紹一下自己,就走到男生堆打關係了。反正現在也沒美女,與其花心思跟這班女孩混熟,倒不如趁早找一班志同道合的伙伴來得化算,而且也不會被人標籤做厹,一舉兩得。
我走過去問道﹕「Hi,你哋都係Account? 」
一個高高瘦瘦的男孩伸出手笑道﹕「係呀!我叫做梁樂言,叫我樂言啦!」
我跟他握了一下手﹕「我叫Samuel,叫我Sam啦!」
旁邊一個跟我差不多高的金髮男生道﹕「你好,我叫呀君。」
對面一個最高,身型胖胖的男生托一托眼鏡,聲音沉沉﹕「你好,我叫Michael呀。」老實說,我覺得他跟安德尊真的很像。
「哈哈,我叫肥成呀。」一個長得跟叮噹一模一樣的人笑著說。
「Hi,我叫Calvin。」Calvin外表白白淨淨無性病,給我的感覺就是典型的俊俏小白臉。
套近乎後,我開始融入他們的話題。
我好奇問道﹕「係呢,你哋頭先講緊咩講得咁開心呀? 」剛才看到他們談得很起勁,還不時發出笑聲。
樂言嘿嘿一笑﹕「無呀,我哋講緊其他soc啲女…同學啫…」然後用眼神瞄一瞄四周的景緻。
『哦,原來係同道中人!』
我回了一個「志同道合」的眼神給他﹕「哦? 咁有無咩開心大發現先? 」
Calvin搶道﹕「我哋發現今年BBA啲Year1質素都ok喎!起碼唔係見到好多半獸人,就咁立一立眼望都見到唔少係above average,有少部份仲好得添!」
呀君道﹕「不過我哋自己個soc就未知啦,而家嚟得小貓三四隻,而且都係麻麻。希望我哋班嘅質素同隔離唔好差咁遠啦!」
我笑淫淫道﹕「少擔心啦,啱啱我過嚟嗰陣撞到我哋個師姐,嘩!佢真係索到呢……」我又沉溺在幻想中。
Calvin道﹕「有無咁正呀? 喂喂!你啲口水流出嚟喇!」
樂言點點頭道﹕「你係咪講緊Karen呀? 真係唔係講笑!堅係得!仲正過夕樹舞子!」說罷直豎拇指。
我下意識摸摸嘴角,笑道﹕「就算係以Karen嘅質素打個七折,都已經正到嘭嘭聲啦!」
沒有說話的肥成與Michael馬上雙眼一突﹕「係? !」然後一臉嚮往。
「喂喂!你哋睇吓!」樂言打斷了我們,眼神望向點名處。
只見幫我們點名的師兄身旁,站著數個也是穿著Account Soc T的男女,他們正在討論著甚麼。
Calvin﹕「喂喂喂!金髮紮馬尾嗰個正喎!」
呀君﹕「啡色長直髮嗰個都得喎!個樣仲好似mix mix哋。」
肥成踮起腳尖看﹕「嗰個矮矮哋,面圓圓嘅都好cute喎。」
Michael托一托眼鏡,沉聲道﹕「我就覺得黑色馬尾嗰個最靚喇。」
樂言笑道﹕「Michael你識貨喎,黑色馬尾嗰個咪就係我哋頭先講嗰個Karen囉。」他頓了一頓,又道﹕「其實啲師兄都好得吖!頭先幫我哋點名嗰個就唔駛講啦!你哋睇另外兩個,一個笑起上嚟有啲似陳冠希,另一個戴黑粗框眼鏡嘅斯文靚仔,同Calvin你都係同一type喎。」
Calvin疑惑道﹕「邊一type呀? 」
樂言、呀君和我異口同聲道﹕「白白淨淨無性病嗰type呀!」說罷我們三個互相擊掌大笑。
Calvin笑駡﹕「仆街啦!你哋就有性病!」

二十分鐘後,我們這邊彌漫著一片愁雲慘霧,每個人都垂頭喪氣,像剛死了老爸一樣……
「呀Sam你頭先又話我哋可以少擔心嘅? 你睇!」呀君看著四周的珍禽異獸,臉黑黑的道。
「我點Q知今年同上年個range可以差咁Q遠喎……」我看了看師兄師姊們,又看了看今年的同班同學,終於深切明白一念天堂,一念地獄的真正含意。
樂言長歎一聲﹕「唉……啲女同學都已經係侏羅紀公園走出嚟㗎啦!連啲男同學一個二個都好似係《稻中兵團》嘅人物咁……」
我點頭和應﹕「真係唔係講笑!我頭先真係見到有個人,同《廢柴同盟》裏面嘅角色一模一樣樣!真係嚇到我吖!真係懷疑古谷實係咪照住佢個樣嚟畫!」
連酷似叮噹的肥成也搖了搖頭。
『屌!肥成似叮噹都算係有selling point吖!起碼可以賣cute嘛!嗰條友樣衰到咁……唔通真係sell核突? 』我心裏暗暗滴汗。
正當我們幾個有些在嘆氣,有些在呆看鄰soc的可人兒時,師兄師姊們就召喚我們,開始了一天無無聊聊的orientation day了。
Orientation day就是帶你到校園四處蹓躂,認識一下校園的設施、場所等。本來我們之前還是很有興致的,期望在這一天能夠認識到幾個標致的女同學,但現在可沒有興趣跟一群怪獸逛校園。於是我們只是默默的跟在後頭。午飯過後,師兄姊們帶我們到名為「小矮人屋」的一堆矮小建築物裏,說要玩集體遊戲,讓氣氛熱烈一點,也好讓我們混熟一點。

「喂,知唔知一陣玩啲咩game呀? 」我小聲問樂言。
樂言有點擔心﹕「唔知呀,唔會係預習定ocamp啲game啩? 」我們全部都已經報了名去faculty的大o和自己soc內的細o。
肥成臉色有些灰白﹕「聽聞ocamp啲game又淫又變態喎!唔係玩呢啲呀? 」
呀君歎了口氣﹕「本來我就係期待玩呢啲,你哋諗吓如果我哋可以同師姊玩? ……」我們聞言一起發揮無窮的想像力,每個人都露出傻傻獃獃的幸福表情……
呀君續道﹕「你哋再諗吓我哋一陣同邊個玩? ……」
「屌!」
「你老味!」
我們立刻民怨沸騰,媽聲四起,馬上就要揭竿起義,推翻暴政……
「頂你!你比我哋自high多一陣得唔得呀? 」Calvin埋怨道。
呀君看也沒看他﹕「等你認清呢個殘酷嘅世界咋,話唔定一陣同你玩嗰件係『極品』呢!做定心理準備喇!」
「我閘住!」Calvin怒吼。
結果呀君不幸言中(對我們來說當然是幸運之極),Calvin被點名與一個雌性怪獸中的boss級人馬玩遊戲,至於玩甚麼就甭提了,反正他被我們恥笑了整個sem1。

「喂!你哋有無報住Hall呀? 」活動完結時樂言問我們。
「我有喎!」「我都有呀!」呀君和Michael回應道。
樂言望向我,我想了一想﹕「唔…我考慮緊……」我的確想住宿舍。聽人說上莊、溝女、住宿舍乃讀U必做的三大活動,雖然我對上莊沒有多大興趣,但另外兩項沒理由放過的。但住了宿舍的話開支就會變得一闊三大,要多找幾份補習嗎?
「考咩慮呀? 一於一齊住一齊玩啦!」
然後他轉個頭望向肥成和Calvin﹕「喂!咁你哋呢? 」
肥成笑笑口﹕「我住得好近,唔駛住hall。」
Calvin臉青唇白,形同喪屍﹕「唔…唔駛預我……」看來他對大學生活已經失去了希望,真可憐。
樂言憐憫的看了看Calvin,搖頭歎息。接著又興致勃勃的道﹕「咁我哋四個一於一齊報做roommate啦!咁啱又係一間房住兩個人,兩間房用一個廁所。」
就是這樣,我跟樂言,呀君和Michael 就做了第一年的大學roommate。

未完待續

注意:此文章排除於CC BY-SA 4.0條款以外,版權歸原作者(羊先生)所有。
未經作者同意,任何人不得冒名、修改、重製、剽竊、抄襲、仿作、轉載文章至其他地方。