「叮噹！」「叮噹！」門鐘聲響咗兩下，我就撲倒去開門。
喀嚓！
「小姐你咩價錢？」門外企咗一個五十幾歲、頭髮稀疏，但未算地中海、有啲肚腩，著住件Ralph Lauren 馬球衫嘅大叔，一邊由上到下掃描著我一邊問。
生客嚟喎……
「門口咪有寫價錢囉，阿叔。」我指住門口塊牌，「八百蚊一個鐘，包沖涼按摩口交做愛，唔錫咀，額外服務價錢另議。」
「可唔可以平啲？」
「阿叔，平得俾你，即係要平俾其他人，我仲駛做生意嘅？」
「我唔會同人講嘅。」
「死人就唔會講嘢，你肯定陣間馬上風我就平俾你！」
「啋過你把死人口！你咁樣做生意等食穀種！」
「平俾你就真係食穀種嘞！你唔好睇醫生嗰時要佢平俾你？」
「你係雞咋！同嗰醫生比！人哋讀咗幾多年書你讀咗幾多年書呀？」
「醫生喺你病急嗰時醫你，同我喺你性急嗰時幫你，道理咪一樣！你無錢返屋企打飛機喇！」
砰！
我好大力閂咗度門。
平你老母！
真係一肚氣！我喺附近都叫少有名氣，湊到啲客舒舒服服，好多客都食過翻尋味，使乜靠頭先個阿叔嗰幾舊水。
俾個阿叔搞到我乜生意都唔想做，我打開番度門，攞番出面個價錢牌同埋個粉紅色「營業中」嘅木板入屋，將大門口還原為一般住宅門口。
拉好鐵閘，閂番道大門，未轉身又有人撳鐘。
我打開番道大門，劈頭第一句就係：「今日唔做生意！」
「易拎姐，乜咁大火氣呀？雙十年華就更年嗱？」
「更你老母！」唔知係咪潮流興，呢幾日鬧人都好順口咁先問候人哋娘親。「你咁得閒唔使做呀？叻姐？」
「依家幾點呀？收舖喇！」我望一望牆上個鐘，仲係停喺四點，再望一望電話，原來已經七點半。「你係咪瞓晏覺瞓到矇咗？」
「係嘞係嘞，係我瞓矇咗嘞，」我拉開度鐵閘，「入嚟喇。」
「幫我拎住啲嘢。」講完就遞上一袋二袋膠袋俾我。
叻姐可以話係我嘅唯一朋友。佢年行廿六，老豆早死，老母又多病，一個女仔撐起頭家。佢就真係夠勇，用佢老豆死後個筆保險金頂咗間魚檔來做。剛開始乜都唔識，高薪請番舊檔主教佢點開檔、攞貨、殺魚等。佢邊學邊做，加上本身聰明，兩三個月就學哂所有嘢。
佢見生意唔多好，知道自己有幾分姿色就拋頭露臉，又賣海鮮又賣色相。邊有麻甩佬見到一個後生女，白色底衫黑色膠圍裙喺個檔度劏魚，然後啲水濺到件底衫半透明嗰時好似裸體圍裙咁，唔會暈下暈下咁去幫襯佢？
當然，去魚檔嘅唔止麻甩佬，如果叻姐啲貨唔靚又唔新鮮，邊有人會買佢啲嘢？
就好似我咁，唔係我服侍週到，邊有咁多熟客？
我拎哂啲嘢入廚房，將膠袋裡面所有嘢分開。蔬菜放入鋅盤，放水浸住；蝦同魚分別放入唔同嘅膠盤，等專業人士操刀；生果同奶就放入雪櫃，最後攞啲米出嚟洗好煲飯。
放好個內膽入電飯煲㩒掣後，叻姐就人咗嚟廚房。佢摺高衫袖，攞出廚櫃裡嘅菜刀，就手起刀落，嚓嚓嚓幾聲就將啲魚臟清理好。
「魚同蝦都係今晚賣剩，留唔到過夜，唔介意嘛？」
「叻姐，有邊次我介意食你嗰啲賣剩蔗，最介意嘅係你唔收錢。」
「反正我都係一個人自己煮自己食，當我嫖你陪我食飯。」叻姐笑著說。
「我喺你心目中咁平咋？！」
「易拎姐，免費係最貴嫁。」
過咗四十分鐘，蒸魚、炒菜、茄汁燴蝦碌已經喺我嗰張細細嘅飯檯上面。我將飯煲啲飯裝起拎過去飯檯，叻姐就除咗條圍裙坐咗喺飯檯一邊準備起筷。
「你都做咗咁耐，唔好再做喇。」叻姐剝緊蝦嗰時同我講。
「唔做你養我咩。」我將舊魚吞落肚後講，「我無乜技能，可以做啲乜維生？」
「你可以落檔幫我。」
「叻姐，你好意我心領嘞……唔係話唔想從良，不過我知自己事，點會願意晨咁早起身去開檔？我唉，唔想到時搞到大家姊妹都無得做。」
叻姐無出聲，其實佢都知道改變唔到我，不過又唔忍心見到我咁樣。
間房靜咗落嚟，連條菜放入口時都覺得凍啲。
過無耐，叻姐又問：「咁你點先唔做？」
平日佢好少提我工作嘅嘢，唔知點解今日已經問第二次。
「或者等個男人唔嫌棄我啩……」我苦笑。
我哋繼續傾下食下，飲下啤酒，就差唔多十點。叻姐要早起開檔，準備起身離開。
「唔好成日屈埋喺房，好傷皮膚嫁，好天氣就出去行下，吸下新鮮空氣。個樣殘好易無生意嫁。」
「得嘞，應承你聽日去行山好唔好？」
「最好喇，不過自己小心啲，唔好變咗我去拜山。」叻姐挖苦我。
「啋過你把死人口！」叻姐今日成個我阿媽咁樣，「我學生嗰時參加不知幾多次野外定向。」
「野外定向定野戰呀？」叻姐一路笑一路行出門口。
「野戰點會唔預埋你？」我立即駁番轉頭。
叻姐喺門口著好鞋，幫我拎走啲垃圾，臨走前講：「真係諗諗佢，我知我今日好唚氣……」
「你話野戰預埋你嘛！」
「你知道我講咩嘅。」
「從良嘛，我諗諗喇。」
「仲有行山呀。」
「得嘞，我會考慮下。」
叻姐走後，我閂番鐵閘同大門。夜闌人靜，間房空洞洞，但係叻姐嗰幾句話一直喺間房度回響，就算揞住對聲都會喺指罅間穿入耳膜。我衝入被竇，想蒙頭大睡，但點都瞓唔著。
隔咗唔知幾耐，我好似蝸牛咁伸個頭出來，已經係天濛光。我入廁所梳洗，見到塊鏡裡面嘅自己。好殘。係失眠而殘，定係因為做到殘？我唔知，但我個心真係離咗一離。
「雙十年華就更年……」
我諗起呢句話，就立刻見到梳妝櫃有咩就搽咩上塊面度。咩嘢護膚品、保濕霜、BB cream都往臉上塗，然後落足心機去化妝，每一筆都要畫到最好。
搞咗差唔多兩個鐘，望番鏡裡面嘅自己。
點解！？
點解比之前仲差仲殘？
點解皮膚都仲係好似乾到裂開咁？
點撚解！？
「呀呀呀！！」
傾鈴哐啷……
我一手將梳妝台上一支支化妝品同護膚乳掃哂落地，然後坐咗喺個角落嗰度喊咗好耐。地上嘅手機有提示我今日有預約，我艱難地伸出右手，用指紋將電話解鎖，打咗句「M到」俾所有客仔，然後將手機扔到唔知邊度繼續喊。
喊到變咗乾屍咁滯，唔知幾點，只係知道天空灰到同我心情一樣。我洗好塊面，打開雪櫃，咬咗幾塊方包，換咗套衫，著咗對鞋，拎好鎖匙同銀包就出咗門。
我漫無目的喺條街度行。眼角未乾嘅淚，模糊了兩旁嘅人同物。路人行得好快，我行得好慢，腳步浮浮，風大啲就可以吹跌我。未落好嘅妝，凌亂嘅頭髮，引得路人問我有無事，但呢句話震動我耳膜後就好似反彈咗出去，完全提唔起我回答或轉頭望過去嘅反應。
我自顧自行，行到一個綠色小巴站，上咗小巴拍咗八達通，坐咗喺左邊最後角落個單人位。
我唔知架小巴去邊，只係一直望住窗外。我見到地鐵站，好幾個地鐵站，紅色綠色灰色黑色。我見到店舖，有新潮摩登同舊款老式，由密集變成疏落。我見到馬路，原本直如筆，變成曲如蛇。我見到沾滿黑色死氣嘅燈柱，逐漸褪色，並開始生長成為一棵棵大樹。
「小姐，到終點站喇，可唔可以落車？」
我落咗車，眼前係好多條山路嘅入口，我唔知行邊條，就好似我往後人生咁唔知應該點走下去。回頭一看，小巴已經走咗，只有小巴站孤獨地企喺度。佢向我招手，叫我回頭。
我回頭，只會繼續殘。
「行山喇。」
叻姐呢句話忽然浮現，推咗我行前一步。
回頭係一條往下沉嘅路，向前係一條死路。
或者死路都好，至少死喺我未殘得哂嘅時候。
於是，我行咗睇落最崎嶇嘅山路。
我沿著山路上上落落，有分岔路就揀最難行嘅嚟行。我已經唔諗住回頭，只係想行到筋疲力盡，然後就坐喺度等死。
天色更加灰，開始落起大雨。本來單薄嘅衣服僅僅夠我保暖，依家加上雨水，體溫霎時下降。我開始大笑，笑場雨來得合時。我繼續行，天雨路滑，山路崎嶇，飢寒交迫之下，我終於差錯腳，跌倒路上，然後暈咗。
醒番打開眼嗰時，第一樣見到嘅係軍綠色嘅帆布同支撐住帆布嘅幾條黑色鐵枝。我四圍望下，發覺自己瞓咗喺一個帳幕內嘅睡袋裡面。我從睡袋伸出左手，望見睡袋內嘅自己一絲不掛。
雖然我嘅身體被不下千人睇過，但未試過喺不知不覺嘅情況下全身赤裸，我不禁叫咗一聲。
「醒咗嘞？」帳幕嘅拉鍊被拉開，一個男仔伸咗個頭入來。
我有如處女般反射地遮住自己身體。
個男仔急忙縮番個頭出去，拉番好拉鍊，然後講「對唔住」。
「你醒咗就好喇，我打緊去求救，好快就嚟。」
「唔好！我唔要！」
「吓？你喺個山度暈咗，唔去醫院好危險。」
「你叫人嚟我就即刻跳落山！」
「好好好……我唔叫……」「你好，頭先我見到有個女仔暈咗，已經醒番喇……係，唔使喇，真係有事我會再聯絡。」
「小姐，佢哋唔會嚟，你真係無事嘛？」
咕咕咕……
「我無事，只係有啲肚餓。」
「我有熱朱古力同麵包。」跟住帳幕嘅拉鍊被拉開咗少少，一隻揸住保暖瓶同一袋麵包嘅手伸咗入嚟。我接過保暖瓶同麵包時，掂到佢隻手。
剎那間，一股熱流從佢指尖湧到我嗰隻被雨水打濕而冰冷嘅手，唔止有暖嘅感覺，竟然仲有觸電嘅感覺，嚇到差啲揸唔實啲嘢。
打開保溫瓶，一股蒸氣立刻噴到我整個臉上。平時啲客加錢要顏射，又臭又腥，同我依家成塊臉被又熱又香嘅朱古力蒸氣包圍著真得比。呷咗一口，滑而濃。嘴唇忽然掂到一舊半溶嘅棉花糖，入口又軟又甜，真係意外又驚喜。
打開透明膠袋，攞起一塊牛油排包放入口。呢啲隨街都係嘅某牌子排包，經過佢隻手後居然變得又軟又香。平時我食兩塊頂下肚都嫌多，今日我竟然食咗大半排！
一定係我太肚餓，我不斷同自己講。
「有無頂到下肚？唔夠我仲有啲餅乾。」
「夠喇。依家幾點？」
「差唔多八點喇。」
「我暈咗幾耐？」
「差唔多一個鐘啩……」佢停咗一陣繼續話，「我日落之前見到你暈咗喺條山路度，就即刻抱起你到呢度。見你被雨淋到濕哂，我……我……」
「你除哂我啲衫？」
「唔好誤會，我當時一心怕你凍親，所……所……所……以……」
「所以你除哂我啲衫？」
「我……我……」
「我啲衫係邊？」
「我幫你晾咗喺啲樹枝上面，但仲未乾。」
「除哂我啲衫後你仲有做咩？」
「我……無……無……亂……摸……我……只……係……幫你……抹乾……身體……」
「然後放我入睡袋？」
「係係……係呀，我之後就一直喺帳幕外面，因為我未試過遇到呢種情況，有啲不知所措，諗咗一陣先記起要求救，然後你就醒咗。」佢好強調佢一直喺帳幕外面呢幾個字。
「我係妓女，被人睇過、搞過不下千次，你唔使太緊張。」我嘆口氣，講出呢個現實。
外面靜咗一陣。
「其實你係乜嘢唔重要，但我唔可以俾我自己唔尊重你，同你嘅身體，同你嘅任何嘢。」
輪到我靜咗一陣。
「點解你要救我？」
「你問得咁奇怪嘅？救一個暈咗喺地下度嘅人唔係常識嚟咩？」佢答完後反問我，「咁點解你一個人乜裝備都無就去行啲咁難行嘅山路？」
「我…我…」輪到我口窒窒，猶疑緊應唔應該同佢講。
「我想抖多陣！」然後捐番入睡袋。
本來只係想瞇埋對眼唔諗咁多，但不知不覺瞓著咗。
無幾耐，我發咗個夢。
我夢見我喺條街度，滿心歡喜等緊一個人。唔知係邊個。總之等緊一個我想見嘅人。好多人經過望一望我，甚至問我幾錢。我一慨不理，只係想見嗰個將會出現嘅人。
路人著得唔係好多衫，但我就著到紮糉咁樣。有啲熱，但一件都唔想除。好怕除咗之後著唔返。我開始出汗。熱到出汗？定等到緊張得出汗？抑或係兩樣都有？
終於佢出現了。
佢唔係好似路人咁行過來我面前停低，亦唔係好似魔術咁忽然間「叮」一聲喺我面前成個人出現，而係由上面慢慢垂落嚟。
額頭，雙眼，鼻，口，下巴。
直至我同佢嘅嘴唇成一水平線。
佢錫我，舌頭伸入我口腔裡面。我充份回應佢嘅訴求。兩條脷交纏著，有如靈蛇交合。濕吻之後，兩條舌頭依然藕斷絲連，直至那條口水線於空氣中蒸發。
我開始脫去我身上厚重嘅衣服，好想佢一路吻下去，但佢沒有咁做。佢只係睇住我，目無表情咁睇住一路除，一啲喜怒哀樂都無。
我已經除哂所有衫，但我依然有啲怕醜，用雙手遮住雙乳同胯間。佢好似好唔滿意，示意我放低雙手。我決定相信我一直等嘅佢，於是放低雙手、打開懷抱，等佢過來好好愛我。
佢滿意咁笑咗一下，但唔係開心嘅笑，而係令人發寒嘅笑。佢一個翻身，喺我面前變咗一隻好大嘅蜘蛛。我好驚，想逃走，但我依然維持住一個「打開懷抱」嘅姿態。原來我已經喺蜘蛛網裡面，彈動不能。
蜘蛛網開始出現一群一群細蜘蛛。佢哋有如軍地攻城咁爬到我臉同身體上。佢哋開始咬我每一吋皮膚同肌肉。我嘅血從每個傷口流出來，淡黃嘅皮膚逐漸變成紅色。面前嘅大蜘蛛開始興奮，不斷射出白液，然後用絲裹好，放喺觸肢上，準備放入我身體內。
「唔好呀！！」乾涸嘅喉嚨終於嗌到出聲，「救我呀！！」
我用力掙脫咗個蜘蛛網，成個人因為餘力向前衝。我合埋雙眼，以為跌入無盡冰冷嘅深淵，但係我竟然感到柔軟同溫暖。
我急不及待緊緊抱著呢種感覺。我抱得好實，好怕下一秒佢就會消失。我張開眼，想喺佢消失之前望清楚係乜事。
我望到一對純真而帶點害羞嘅眼睛。
「你……你……大叫，我入嚟睇下乜事，然後你就……就……撲……撲埋嚟攬……攬實我……」
我發現我喺個帳幕內，赤裸地攬住救我嘅男仔。
「抱住我……」我蚊滋咁細聲同佢講。
「真……真……係要……？」
「你唔係救咗我咩？為人為到底嘛！」
無耐，一對有啲震但有力而溫暖嘅雙臂抱住我，好似被一隻好大嘅啤啤熊抱住。肌膚嘅熱度驅走肩膊及背部嘅冰冷，就算無著衫嘅我都唔覺得凍。
「你……頭先……無事嘛？」佢對手開始無咁震。
我情緒已經定下來不少，只是想繼續享受呢種溫度，所以無答到佢。
「我知你未必想講，但你講的話我一定會聽。」
「你繼續攬住我咪講囉。」
呢一刻我係一個唔合格嘅妓女。放下心理堡壘、小鳥依人撒嬌、投入個人感情，所有唔應該做嘅，我今晚都做齊。
就好似每晚叻姐嘅飯餸，佢用熱朱古力同麵包就俘虜咗我。
「吓……我……」佢鬆咗少少手但又唔係完全放開哂。
「我今日真係想死嫁……」我心諗如果同叻姐傾，佢一定鬧我，不如同呢個過咗今日就唔會見到嘅陌生人傾好過。「因為我見到自己個樣好殘，廿五歲好似五十歲咁。」
我以為佢會笑我傻，笑我白癡，但佢無。佢「唔……」咗一陣，諗緊點答我。
「你覺得因為你係做……妓……女……」嗰兩個字講得特別細聲，細到聽唔到，「做到殘哂，唔開心所以想死？」
「可以咁講喇，嗰一刻我好抑鬱，渾渾噩噩咁，然後不自覺諗到不如死咗去算。」
「其實，你想唔想繼續做？」
「有頭髮邊個想做癩痢？」
「既然係咁，你可以慢慢唔做。」佢講得好慢，每一個字都諗清諗楚先講，「你可能有好多理由唔可以即刻唔做，但只有你有一個理由唔去做，就堅持住呢個理由，逐少逐少去改變。」
「時間上你應該非常充裕，空餘嘅時間其實可以去下興趣班，充實下自己。」
「我諗唔到有咩想學，或者諗唔到有咩學咗可以搵得番咁多。」
「錢係重要，但我相信好多嘢比錢重要。」
「但係我……」我始終無信心去改變我自己。
佢忽然從我身邊離開，剎那嘅涼氣令我哆嗦咗一下，佢將睡袋拉過來俾我捐番入去，然後拉開帳幕入口嘅拉鍊。原來已經天濛光，呢個帳幕嘅遮光能力真係一流。
「你知唔知點解我咁大雨行上嚟？」
「唔知。」同問一個食緊飯嘅人「食緊吃飯呀」一樣咁廢嘅問題，平時嘅我肯定會鬧佢廢話。
「你知唔知近來發生乜事？」
「你指係遊行示威嗰啲？」我記起某幾個客一路做，一路罵「屌死你班大學生」，「我有聽聞過嘅……好幾個客唔係好鍾意佢哋。」
「我係其中一個你啲客想屌嘅大學生。」佢停咗一咗望我有咩反應，我示意佢繼績講落去，「我生於斯，長於斯，睇見呢個地方由從前嘅美好淪落到此，真係好悲傷。」
「我哋呢班人唔想呢個地方失去光輝、失去自由；我哋唔想生活喺一個監獄裡面、一個《1984》嘅世界裡面。」
我唔係好明佢講緊乜，但我見到佢眼有淚光，佢真係好鍾意呢個城市。
「所以，我哋要努力保護呢度，揸緊我哋宗旨，迫使政權回應我哋嘅訴求。可惜，政府一直唔正面回應，只係用一啲無法律效力嘅言詞含糊以對。」
「我覺得好氣憤，又好無力，於是我決定行山，想試下排除萬難到達目的地嘅感覺。落大雨嗰時我都好驚自己有事，但我有哂準備。」
佢帶淚嘅眼光開始有神，亦閃出咗堅定嘅光芒。
「我恐懼，但我無誤判；我行山，但我唔逃避。」
佢一路望住前面，天空開始出現一扇橙光。
「你睇。」我同佢一齊望前面嘅半輪晨曦，「我相信黑暗過後會有陽光，排除萬難後會有轉機。」
「就好似你話齋要堅持？」
「無錯。」我哋四目相對，「昨日嘅你已經死咗，今日嘅你由呢一刻重生，只要你堅持的話，你一定做到。」
我從來唔知道，眼淚係一種高度傳染病，好耐無咁濕過。
「我……我無心……搞……喊……你……」佢急忙遞張紙巾俾我，「真……真係……對……唔…住……」
我無攞張紙巾，將我嘅淚水印落佢塊面度，情不自禁喺佢唇上錫咗一下。
佢塊面立刻又紅又漲，口窒窒咁講：「我……第一次……接吻……你……」
「我都係……第一次……接吻……」乜漏口會經由口水傳染嘅咩？！
佢聽完後碌大隻眼望住我，搞到我又尷尬又怕醜，唔敢望番佢轉頭。
「我我我……又未拍過……拖……又……唔會俾……啲客……錫咀……咁梗梗……係……第一次……」我停唔到口窒，於是我深呼吸一口氣，大聲鬧咗一句，「你唔准笑我！」
佢嚇咗一嚇，然後開始笑說：「你又怕醜又要面，真係好好笑。」
當我正想送佢一巴嗰時，佢話：「不過呢種又嬌又嗔，其實好可愛……」
啪！
我當然無摑佢，只係喺佢手臂上大力打咗一下。
「痛呀！」
「哼！你知唔知我陪過夜收好貴嫁？」我回復我一貫嘅口氣，「不過見你青頭，就當我大發慈悲免費送一次俾你喇。」
「免費送埋第一次俾我？」
「你你你……我要走喇！」真係激死我，竟然被佢佔上風！
佢笑笑口爬出咗帳幕，將我啲乾咗嘅衫拎番俾我。我換好衫，檢查一下鎖匙銀包電話。銀包無嘢唔見，電話有十幾個來自叻姐嘅未接來電。
佢將帳幕同睡袋執好揹番上身，清理好雜物垃圾，就帶我行番落山。
望住佢背影，好想呢段下山嘅路行唔完，但又點有呢個可能……
終於到咗山另一邊嘅車站，我哋再次望住對方。
「到嘞……」佢首先說話。
「係喎……」我指住右邊嘅小巴站，「我搭嗰邊嘅小巴，你呢？」
「我坐巴士。」
「咁我哋拜拜喇喎……」
「係……係…拜……拜……」
「多謝你救咗我。我會永遠記住。」
「唔使多謝……」正當我轉身嗰時，佢問我，「我哋會唔會再見？」
「如果嫖客有評分制，你肯定係一百分滿分，梗係想你搵番我。」
「咁你即係繼續做？」佢失望咁問我。
「如果一直有個一百分嘅嫖客搵我，邊度會想被其他人嫖？」
「咁……咁我點……搵你？」
「香檳大樓四樓十二號，我叫Elaine，撳鐘就得。」
「我……我會去……搵你，我叫……」
我無等佢講完，錫咗佢一下。
「等你搵我嗰時再講我聽喇。」
然後，我坐上咗準備開走嘅小巴。
