萬聖節前夕。
「志豪。」俊仔一到放工時間便出現在我眼前。「一齊去飲返杯？」
「吓？」
「個萬聖節party啊，一齊去啦。」
「你去啦。」我抽出邀請函遞給他。「上面冇寫plus one，我都係唔去喇。」
「一齊去啦，志豪。張野你既，我驚佢唔俾我入。｣
拗不過俊仔，我隨著一同去了，到達地址時我嚇了一跳，幾天前還只是小巷的地方，現在已經有個裝潢華麗的門面，但大街上的人似乎完全沒留意，仍然自顧自來往街上。門口站著兩個魁梧的黑衣男子，目光緊盯著我們，雙手交叉抱胸。霓虹燈映照下，我仿佛看見他們背後還有點甚麼。
俊仔壯著膽子向他們走去，遞上黑衣女孩給我的傳單，然而黑衣男子的目光仍然鎖在我身上，絲毫沒看俊仔一眼，我感到一種令人窒息的壓迫感。
「佢係你既？」
「我地係一起既。」片刻，我終於找回自己的聲音，聽上去有點沙啞。
如此，黑衣男子才讓出一條路讓我們進去，其中一個在俊仔身上貼了個貼紙，H.S. Plus one。
「H.S. ?點解？」
黑衣男子沒有再回答，只是示意我們進去。
進去裡面，第一眼見到的是一片黑壓壓的人群，每一個人都穿著一色黑色的衣服，穿著黑色西裝的我們倒也不算礙眼。場內裝潢華麗，正中央的位置搭建了個平台，上面只放了把黑色的高背椅。兩旁則放了長桌，上面是各式飲品及食物，許多都是我們未見過的，俊仔馬上便拿了支啤酒，正研究著各種小食。
不久，便有人來搭訕。
「嗨，好生面口喎，新加入既？我叫Roy。」
「我係志豪，佢係……」
「你新加入既？你係邊種？」
我還沒介紹俊仔便已經被Roy打斷，他似乎對俊仔一點興趣都沒有，就好像他根本不在。
「邊種？呃……」
正當我遲疑不知如何回答時，俊仔過來挽住我的手臂，嘿嘿笑了兩聲。
「咁你又係邊種？」
Roy這才正眼看了看俊仔，皺皺眉後露出一口亮白的牙齒呲牙一瞪，便轉身走了。
直至Roy走遠了之後，俊仔才大笑出聲。
「嘩，好彩有我陪你咋。志豪，睇唔出你咁勁，男女通殺。」
「頂你，飲你既啤酒啦，飲完快啲走，你唔覺得呢度啲人好古怪咩？」
「你話Roy啲牙白雪雪又尖到好似人工製造？」
「唔止，你唔覺佢地啲眼神好怪咩？好似你唔係度咁。」
「係佢唔多鐘意我姐，放鬆啲玩啦，志豪。」
說罷俊仔便去取食物，他夾了些肉醬意粉還有些未見過的小點心，小小一團粉紅色的肉蓉放在蘇打餅乾上，是像櫻花的淺粉紅色，看上去很精緻，還有一陣清新的香氣。
「如果我係你，就唔會食呢樣。」後面有人走近，是那日派傳單的女生，今日她還是一襲黑裙戴黑帽。
「點解？睇落好好食啊。」
俊仔叉著肉醬意粉便放入口中，立刻又吐出來。
「咳……咳！唔係意粉黎既！」
「係腸粉，用腸切成細絲做既。至於係乜野既腸，我諗你應該唔會想知。」
「咁呢樣係咩黎？」俊仔拿起粉紅色的點心，面色有點發青。
「腦蓉。」
俊仔聽罷馬上把整碟食物放下，連啤酒也不喝了，面色越來越青，好像快要吐出來的樣子。
「啤酒就真係啤酒黎既，可以放心飲。個邊啲野會啱你食。」黑衣女指一指另一邊的長桌，那邊也站著有一群不知所措的人在東張西望，衣著明顯和其他參加者不同。「不過我勸你唔好係嗰邊留太耐，拎完野食就好返過黎。」
黑衣女拿下帽子，原本遮住的地方長了兩隻小小的尖角，眼睛是鮮紅色的。她揮一揮手，俊仔放下的啤酒便自動飄去他跟前，俊仔遲疑地接過。
「係呢度，人類單獨一個人係好危險架。其實你地根本唔應該黎。」
「你究竟係咩黎？呢個究竟係咩party?張邀請函……」
「呢度係每年萬聖節前夕舉辦既香港分區怪物週年大會。我係惡魔族既代表。」黑衣女指著平台上的高背椅。「我地會係今晚選出新一年既領袖。今晚唔止惡魔族，吸血鬼一族、狼人族、人魚族、獸族、屍族既代表都黎左。」
正當黑衣女解釋著情況時，大廳的燈光突然全部熄滅，全場一片漆黑，然後平台上點起燭光，有人慢慢行上平台。
「一年冇見，萬聖節快樂！」台上的人慢慢轉身，那人穿著黑色高領襯衣緊身黑色皮褲，背後還搖著長長的貓尾巴。「大家今年過得好嗎？」
台下響起震耳欲聾的拍掌聲和歡呼聲。
「我知今年大家都過得唔容易，我地獸族被人類殘殺，失去左好多同胞，人魚族既大海俾人類污染到住唔到要上岸，人類既血越黎越污糟，搞到吸血族長期營養不良。但係！為左怪物既未來，我地要忍耐！我地特別製造既混血種已經成功混入左人類世界，好快我地怪物就可以係地下統治成個香港！到時大家就可以有好日子過！」
「呢個計劃，係前人同我地努力既成果。我希望無論邊族繼位，都要為左成個怪物界著想，堅持落去。宜家，又係每年狂歡既時間。萬聖節快樂！」
台下既掌聲同歡呼聲再次響起，燈火再次亮起，然後我聽見各處開始傳來撕咬和尖叫的聲音，聲音越來越大，我想跑但身體無法動彈。
「唔好望，你地係時候要走。」有人遮住了我雙眼，那是黑衣女的聲音。
等我再次看到東西時，我已經回到大街上，小巷口又變回和之前一樣，沒有華麗裝潢的門面，沒有魁梧的黑衣大漢，黑衣女也不見蹤影。
「志豪……我……」俊仔的面色有點蒼白，他的脖子上，是兩個整齊的牙洞，正慢慢癒合，然後他就這樣倒在地上。
我把俊仔送往醫院，醫生說他只是貧血暈倒，沒甚麼大礙，休息一下就可以走了。
「後生仔鐘意玩都唔洗玩通宵架，今晚唔知第幾個貧血送入黎。」醫生一邊低聲說一邊對著電腦打病歷。
「醫生，乜今晚好多人貧血咩？」
「你地班後生玩得癲，今晚開咩萬聖節party，咩古靈精怪既理由入黎都有，咩俾貓狗咬傷、食錯野、浸親都有，入到黎又咩事都冇。」
我突然想起台上那人說混入人類世界的混血種怪物，難道這些受傷的人都是感染了變成混血種？
另一邊，俊仔坐起來，眼睛閃過紅色的光芒。「志豪，不如一齊去飲返杯？」
完
