注意：此文章排除於CC BY-SA 4.0條款以外，版權歸原作者（羊先生）所有。
未經作者同意，任何人不得冒名、修改、重製、剽竊、抄襲、仿作、轉載文章至其他地方。
第六章
「小惠呀，係咁嘅……有個問題想問吓你呀……」我忸忸怩怩的道。
小惠瞄了我一眼﹕「有咩就直接講啦，你呢個衰樣好嘔心呀！」
「無……係咁嘅……係呢……你知唔知呢……嚟緊sem2 Fiona會揀咩P.E.堂呀？」
小惠淡淡的道﹕「我知呀。」
「係？！」我高興萬分，小惠果然辦事得力！
「咁係咩呀？」我熱切期待的看著她。
小惠看也沒看我繼續看書﹕「做咩要話你知呀？」
我馬上拉長了臉﹕「你唔係會幫我咩？」
「咁都要睇吓你抵唔抵幫㗎。」
「緊係抵啦！抵到爛呀！」我括不知恥的道。
小惠「哼」了一聲﹕「說好的半島high tea呢？」
我面有難色﹕「大人你唔係唔知小人呢排手緊啦……下個禮拜！下個禮拜一定同你去！」
小惠得勢饒不人﹕「寫．欠．單！」
「吓？……」想不到她做得這麼盡。
小惠囂張的看著我﹕「唔寫罷就。」
「寫寫寫，即刻寫！」我無奈就範。
頃刻。
「哈！咁就差唔多！」小惠拿著欠單得意洋洋，然後又道﹕「如果你唔照做呢，我就放上facebook，寫哂前因後果，睇你仲點追Fiona？」
『喂喂！你唔係返嚟幫我嘅咩？』我真的想不透小惠在想些甚麼。
我點頭哈腰﹕「係嘅係嘅。咁……你可以話我知Fiona報咗咩未？」
「社交舞。」
我楞了一下，重覆她的說話﹕「社交……舞……? 」
就是這樣，我下學期的P.E.課就選了社交舞。
「小惠，我好緊張呀！」我坐立不安。
小惠不屑道﹕「緊張咩啫？又唔係叫你同Fiona表白。」
「咁話哂我咁大個仔都未跳過舞呀嘛……」
「駛乜驚啫！有我呀嘛！」小惠充滿信心。
我非常驚訝﹕「你識? ！」
「唔識喎。」
「咁你又話…….」
「跳舞嘅嘢，來來去去都係咁啦，容乜易！」
說著說著，我們已經走進活動室，Fiona赫然坐在一旁。
我故作驚訝的走過去﹕「咦? 你又係揀咗社交舞呀? 」
Fiona一臉驚訝的看著我﹕「係呀，又會咁啱嘅? 」接著又看了小惠一眼。
我搔了搔頭﹕「係喎，我嚟到見到小惠已經覺得好出奇啦，估唔到會見到你喎。」
Fiona奇道﹕「你又會揀跳舞嘅，你唔係鐘意打波咩? 」
我笑道﹕「咁難得有得學跳舞喎，點都試吓啦，波幾時都有得打啦。」
小惠噘噘嘴﹕「唔好話你想藉機可以同女仔有親密接觸? 」
我滿臉通紅，雙手亂揮﹕「你……你唔好聽佢亂講呀……」
『死小惠！就算係真都唔駛當住Fiona面講出嚟呀? 』
Fiona抿嘴一笑﹕「我知小惠係講笑啫。」
就在這時，老師對大家說話﹕「好喇各位，今日係第一堂，大家各自搵一個partner先，嚟緊呢個學期都會同你個partner一齊跳舞㗎啦。」教社交舞的老師是一位中年女士。
其中一個同學舉手問﹕「係咪一定要男配女? 」
老師回答﹕「最好係啦，不過唔係都唔緊要，始終我哋女多男少。」
聽罷老師的宣布，我們三人你眼望我眼。我當然想當Fiona的舞伴，但撇下小惠又有點兒那個，但我又不可能跟小惠一組，那怎麼辦? 她倆一組嗎? 那我來幹甚麼?
就在我苦苦思索時，小惠天賴的聲音傳來﹕「我要去搵過靚仔做partner啦，拜~」說罷就走開了。
噢！小惠我愛死你了！
我偷偷的瞥了Fiona一眼，正好跟她的目光對上，我臉上一紅，然後「咳」一聲，裝模作樣道﹕「May I be your partner? 」
Fiona噗嗤一笑﹕「My pleasure！」
分組完畢，同學們兩個兩個的站在一起，我看到小惠真的找了個高大俊朗的男生做舞伴，還笑語盈盈的跟對方交談，我心裏有點不是味兒。
老師見每個同學都已經找到舞伴，就拍一拍手﹕「好喇。都有partner啦嘛……好，咁我哋今個學期會教幾隻basic嘅社交舞。有慢三、快三、慢四同快四，如果大家學得快嘅仲可以教埋Rumba或者Cha-Cha。就睇吓你哋學到幾多喇。至於考試方面就由四隻basic舞步裏面你哋自己揀兩隻嚟跳，就係咁簡單。」老師頓了頓，道﹕「咁我哋而家開始喇……嗰位女同學出一出嚟同我做個示範。」說罷指了指左手邊一位短髮女生。
那位女生有點緊張的走出去，老師笑道﹕「唔駛咁緊張，嗱，你做女方，我做男方，隻手咁樣放……」說罷左手握著女生的右手，右手輕輕的放在女生背部中間較上方，然後將女生的左手放在自己右手臂上，讓她的手掌搭著自己的肩膊。
擺好姿勢後，老師環顧四周道﹕「大家睇清楚個姿勢點擺未? 呢個叫做慢三，係由華爾茲簡化而嚟，顧明思義，佢係三拍三拍咁跳。好，大家睇清楚啦。」然後轉頭跟那女生道﹕「同學，你睇住我隻腳點郁跟住就得啦，我會跳得好慢，你可以慢慢跟，ok? 」
「o……ok。」
然後老師就「一、二、三、一、二、三」咁慢慢喺一個範圍裏面重覆移動著。女生剛開始還有點手忙腳亂，但一會後就很順利的跟著老師的舞步。
我跟Fiona耳語﹕「好似好簡單咋喎。」
Fiona點了點頭﹕「嗯，啲舞步都係不斷重覆，所以唔難。」
老師見女生已經可以跟著她舞步，就說﹕「咁我而家會移得大範圍啲，同埋會轉圈囉喎。」說罷將步距加大，再加上轉圈。跟剛才一樣，女生開始時跟不到節拍，但不久後又很順利的跳下去。
「就係咁樣。」老師停止了示範。
「好，到你哋啦，開始時我會用一個慢啲嘅音樂，之後會慢慢加快。咁大家同個partner一齊擺好個姿勢先。」
我緊張的看著Fiona，然後遞起了左手。Fiona慢慢的將右手搭上來……
這就是Fiona的手嗎? 軟軟的，滑滑的……我……我終於牽著Fiona的手了！我在做夢嗎?
「呀Sam，你隻右手要貼住我背脊呀。」Fiona看我呆呆的只是牽著她的手，提醒道。
「哦……哦！係……」我的右手微微顫抖，輕輕的貼著她的後背。
咦? 怎麼觸感有些不對勁?
「啊！對唔住……」我像觸電般的縮手，因為剎那間醒悟到我隔著薄薄的體育服碰到她的內衣扣了。
Fiona俏臉一紅，靦腆道﹕「唔……唔緊要，你掂住啦。」
我滿臉通紅﹕「哦……哦……」
我避開內衣扣的位置，將手輕輕碰著Fiona的背部。但即使只是這種隔靴搔癢式的碰觸，已經足夠讓我心跳加速，小鹿亂撞了。
「你好緊張呀? 你隻手出哂汗啦……」Fiona問道。
我本想答不是再找個理由掩飾一下，但腦海靈光一閃，如實的答道﹕「係……係呀……拖住個靚女真……真係好緊張呀……」我還要誇張的抬起手臂抹一下額上旳汗。
Fiona噗哧一笑﹕「仲識口花花即係唔緊張啦！」
「呢位同學，你隻手要擺呢度，兩個人個身要貼啲。」老師走過來糾正我倆的姿勢。
我們被老師一弄，我的手已經緊貼著Fiona的背，而且我倆之間的距離已經差不多到達胸貼胸的程度。
我強忍著擁她入懷的衝動，偷偷瞄了她一眼，只見她滿臉紅暈，默默的等待著音樂。
音樂響起，我們慢慢的跟著音樂舞動。剛開始時大家都不熟練，所以不時有些腳踏腳的場面。每次差不多跌倒，我都捉得Fiona緊緊的，讓她的身體靠著我，而每次的身體碰觸，都讓我心神盪漾一番。
過了一會，我跟Fiona都熟識了舞步，開始越跳越暢順，我腦袋開始可以跳出來思考。
我腳下不停步，嘴巴開始跟Fiona閒聊﹕「點呀? ok嘛? 」
Fiona看著我笑笑﹕「ok呀，又幾好玩喎！」
啪，音樂驀然停止了，我倆不自覺的停下來，然後老師的聲音傳來﹕「大家都跳得唔錯，而家可以休息一陣先。」
甚麼嘛? 正和Fiona跳得高興，怎麼這麼快就要休息? 我還想繼續啊！
想是這麼想，我還是和Fiona到一邊的長椅坐下。
這時候，小惠走過來，看著我們，一臉曖昧的道﹕「咦? 你哋做咩仲拖住手嘅? 跳到唔捨得放開呀? 」
甚麼? ? ? 我還牽著Fiona的手嗎?
我看了看，馬上嚇得縮了回來，一臉窘困，手足無措﹕「sor……sorry呀，我……我都唔記得咗……」
Fiona也是害羞得雙頰緋紅﹕「無……無嘢呀……」
我狠狠的瞪了小惠一眼，怪她破壞了我的好事。
小惠裝了個鬼臉，然後坐到Fiona旁邊道﹕「Fiona你要小心啲呀！有啲衣冠禽獸會借啲意跳舞嗰陣抽你水㗎！」
我怒視小惠﹕「盧家惠你講咩呀！……」
小惠伸了伸舌頭﹕「我又唔係話你，你咁緊張做咩啫? 」
我一時為之氣結。
Fiona微笑道﹕「小惠你唔好玩佢啦。」
小惠「哼」一聲﹕「有人自己心虛咋嘛，關我咩事喎~」
這時候老師道﹕「好喇，今次我哋試吓換partner，大家各自去搵另一個partner，再練過頭先隻慢三。」
小惠一把拉起了Fiona，道﹕「今次我要同Fiona跳，無你份啦拜~」
我反應不過來，呆呆的站著。不多久，就好像只剩下我跟小惠的舞伴了。對，就是那個高大俊朗的傢伙。
高大衰苦笑道﹕「睇嚟今次我哋要一組啦……」
怎麼? 很難為你嗎? 要苦笑的應該是我吧?
音樂響起，因為高大衰比我高出了半個頭，所以很順理成章的當了男方，扶著我的背。
我直覺上覺得這個男的很討厭，而且給他一直掃著背的感覺實在太嘔心了，所以我一開始就已經黑著臉。
高大衰卻沒有留意我的表情，和我搭訕道﹕「喂！你個partner都幾靚喎，識得㗎? 」然後一直望著小惠她們。
我十分介意他的目光在小惠和Fiona身上掃射，所以臉色又再黑了黑。
他沒有在意我沒有理會他，自顧自的說下去﹕「不過我個partner都好靚！同你嗰個有揮！」說罷還要「嘿嘿」笑出聲來。
『條仆街仲喺度淫笑? 果然係衣冠禽獸！』
我的臉色更加有如包青天，正想踏他的腳背讓他失平衡跌倒，突然又轉念收腿。
『而家就咁踩落去咪益咗佢? 我起碼都要踩佢第三隻腳啦！』
於是我馬上思索著有甚麼方法可以教訓他，想著想著老師的聲音又傳來了。
高大衰聽後一臉興奮的走過去小惠她們那邊，不知跟她們說了甚麼，小惠就走了過來，只剩下Fiona和高大衰在那邊。
「喂！做咩呆哂呀? 跳舞啦！」小惠抓起我的手。
「吓? 咩呀? 」我還在發呆，搞不清狀況。
小惠沒好氣﹕「換partner呀！」
「咩話? 」我驚叫。
整個班房的同學都看了看我們。
「作死呀? 咁大聲鬼叫做咩呀? 」小惠扭了我手臂一下。
我沒理會臂上傳來的痛楚，急道﹕「做咩比Fiona同嗰條友跳舞呀? 」
小惠白了我一眼﹕「咩嗰條友呀? 人哋有名㗎！」又道﹕「人哋高大靚仔又有禮貌，有咩問題? 」
我急道﹕「你唔明㗎啦……唉呀，點算呀……」
小惠「唓」一聲﹕「跳隻舞啫，又唔會比佢食咗，你驚咩呀！」
我急無可急﹕「就係驚比佢『食』咗呀！唔得！」我拉著小惠走到他們旁邊跳舞。
我一直用死魚眼瞪著高大衰，留意著他有沒有對Fiona不軌。只見他只是正經百八的跳著舞，手還是放在應該放的地方。
「呀！你踩到我啦！」小惠尖叫著。
我這個時候自然沒法好好的跳舞。
小惠不滿﹕「死人頭！專心啲得唔得呀！剩係掛住你個Fiona！」又捏了捏我的手臂。
「係啦係啦！」我敷衍道，目光還是注視著他們。
「妖！」小惠狠狠的踏我的腳背。
「呀！」我痛得抱起受傷的腿在單腳跳。
整個班房都停下來看著我。
「同學無事呀嘛? 」老師走過來關懷的問道。
「無……無無……」我痛得眼淚水也擠出來了。
老師看一看手錶﹕「時間都差唔多，呢位同學又受咗傷，我哋今堂就上到呢度啦。」
我目光四處搜索﹕『死小惠走咗去邊? 唔踩返你我唔姓陳！』
然後竟然看到小惠看也沒看我，就跟高大衰有說有笑的離開了。
我驚怒的瞪大雙眼﹕『仲要當住我面跟佬走? ！真係當我死㗎? 』
我想追上去，可是受傷的腿發不到力，害得我又差點跌倒。
我唯有原地坐下搓著受傷的腳掌，Fiona坐過來關懷的問道﹕「你無事呀嘛? 」
我雖然很痛，但還是裝作沒事﹕「無……我無事……」然後又想站起來。
Fiona馬上扶著搖搖欲墜的我﹕「唉呀，我扶你返Hall啦。」
哈！想不到被小惠踏了一腳竟然有便宜可以撿，真走運！
『哼！今次我就比面Fiona，嗰一腳就算數！不過你唔理我同高大衰走咗去呢一筆我一定同你計！』
我裝作不好意思﹕「但……但會唔會阻住你上堂呀? 」我明知故問，其實小惠已經將Fiona的時間表給了我。
Fiona搖了搖頭﹕「我下晝先有堂。」然後將我的一隻手搭上她的肩膊，再用手摟著我的腰將我扶起來。
我裝作一臉痛苦的站起來(痛是真的痛啦，不過沒我裝的那麼誇張)，Fiona看我痛得臉容扭曲，擔心道﹕「會唔會係傷到啲骨呀? 不如call白車啦? 」
我急道﹕「唔……唔駛，我係啱啱企起身嗰吓痛啲啫，企咗起身就無咁痛啦。」我馬上調整一下痛苦的表情。
Fiona還是有點擔心﹕「咁你行到嘛? 」
我眼珠子一轉﹕「行就行到，不過要慢啲囉。」嘿嘿！越慢越好呀！
「咁我哋慢慢行啦。」
然後Fiona就攙扶著我，一拐一拐的離開。
由體育館回宿舍的路程平時只有十分鐘左右，但我們足足走了半小時。
『唉……如果可以一直行落去就好啦……』我一邊享受著與Fiona的親密接觸，一邊嘆息著幸福的時光總有完結的時候。
走著走著，不知不覺已經回到宿舍門口。
我放開Fiona肩膊﹕「唔該哂你呀，我自己上去得啦。」然後拐著的走了一兩步，又假裝站不穩要倒下。
Fiona馬上走上前扶起我﹕「我扶埋你上去啦。」
我不好意思﹕「真係唔該哂你呀！」Yeah！成功了！
Fiona笑笑﹕「傻啦。」
鏡頭一轉，我們已經到了房門口。
『好彩平時都有執房啫，唔係都唔知比唔比Fiona入去好。』正當我沾沾自喜，拿著匙卡想開門時，突然想起某事。
『仆街啦！我唔記得而家係同小惠同房添，比Fiona見到啲女仔嘢咪死? 』
我開門的動作停了下來，正在想用甚麼藉口不讓Fiona進去。
Fiona見我還沒開門，問道﹕「做咩仲唔開門呀? 」
我冷汗直冒，心虛道﹕「……無……我突然間諗起間房未執好鬼亂啫……」不知道這個原因能不能忽悠她。
Fiona微微一笑﹕「男仔房係亂啲㗎啦，怕咩啫。」接著就將我的匙卡插了進去，再拉一拉把手開門。
『金翅仆街鳥……..』我硬著頭皮讓Fiona扶了進去。
「右……右手邊係我……我嘅……」我手震震的指著右邊的床位。
Fiona笑了起來﹕「又話好亂嘅? 仲整齊過我間房喎。」的確，我最討厭東西四處放，所以我那一邊可以用整齊乾淨四個字形容。
Fiona又看了看凌亂不堪的左手邊，奇道﹕「你唔係同樂言同房咩? 點解佢咁多公仔呀，化妝品呀，喺張床度嘅? 」
我面青唇白﹕「嗰……嗰啲嘢……係……係佢女朋友㗎……」
Fiona恍然大悟，然後又笑道﹕「唔怪得你話要執吓間房啦，我仲以為係你啲嘢好亂添，哈哈。」
我暗呼一口氣，看來她沒有看穿。
我慢慢走到床沿坐下﹕「係呀！樂言同佢女朋友囉，兩個人都哩咁hea，啲嘢又四圍擺又唔執喎，咪咁囉。」我說的當然是盧家惠這個極品美少女啦！
Fiona「格」的一聲嬌笑﹕「咁好彩佢無擺埋去你嗰邊啫。」然後拿起椅子坐到我旁邊。
「哼！佢敢? 」如果小惠侵占我的領土，我一定將那些東西丟出窗外。
Fiona噗哧一笑﹕「好喇！除咗隻鞋睇吓隻腳點? 」
我慢慢將鞋襪脫下，只見腳背紅紅的腫起了一塊，周圍隱約見到瘀青。
我心內抱怨﹕『死小惠！駛唔駛踩得咁大力呀！』
Fiona眉頭一皺﹕「好似腫得好犀利喎，你有無跌打酒呀? 」
「樂言好似有。」話一出口，我就後悔了，因為Fiona馬上走到小惠滿佈雜物的書桌面查看。
我怕她找到小惠的個人物品，馬上道﹕「呀！……呀我諗起枝跌打酒應該喺佢女朋友間房，你唔……唔駛搵啦，我打比佢啦。」
言畢，我馬上打給樂言。
「喂樂言，你喺唔喺六樓呀? 」
…………………………
「無，諗住問你借枝跌打酒啫。」
…………………………
「Thank you。咁我而家落嚟攞啦。」
我掛上了電話，對Fiona道﹕「你喺度坐陣先啦，我落去攞。」
我正想站起，Fiona已經按著我的肩讓我坐下﹕「你咁樣點落去呀，我幫你攞啦，樂言幾號房? 」
我楞了一下﹕「哦……609。」
Fiona吩咐道﹕「你乖乖坐喺度唔準亂咁走呀。」
我雙手高舉﹕「知道啦，大人。」
Fiona笑一笑就離開房間了。
還好小惠踏傷我的腿，不然也沒機會跟Fiona有如此親密的接觸。跟她的關係又好像進一步了，不知道現在跟她表白會不會成功呢? 唉……算了，還是再醞釀一下吧，我可不想像將來的我留下一個遺憾。
我想著想著，突然想起一件要緊事要馬上做的，就是檢查清楚小惠有沒有留下她的個人物品在房內，例如是相片甚麼的，免得Fiona有機會看到。
我馬上掃視了她的床，那些毛公仔和化妝品甚麼的都沒關係，我再走到她書桌查看了一下，都是些書本呀，CD等的東西，相片倒是沒有。
我呼了一口氣，回到床邊坐下，應該沒有破綻吧。
一會兒後，Fiona拿了跌打酒回來，她又看了看凌亂的左手邊，表情好像有點不自然。
我沒有在意，向Fiona道謝﹕「唔該哂你呀。」然後伸手向她拿跌打酒。
Fiona沒有將跌打酒遞給我，逕自的坐在我旁邊，然後柔聲道﹕「我幫你搽啦。」
『What? 我無聽錯嗎? Fiona自己提議幫我搽跌打酒? 佢知唔知跌打酒搽完仲要捽㗎? 』
雖然我恨不得馬上提腿放到她手上，塗完腳背再脫光光讓她在我身上塗跌打酒，但我還是不好思意的道﹕「咁……咁唔係幾好嘅……」
Fiona鼓起腮，嗔道﹕「你自己搽發唔到力捽唔散啲瘀㗎，快啲遞隻腳上嚟！」
我完敗於她可愛的生氣模樣，紅著臉將腿擱在她的大腿上。
她倒了一點跌打酒在手上，然後輕輕的塗在我的腳背上，她邊塗邊道﹕「如果痛你出聲喎，我會細力啲。」
「嗯。」
她慢慢的用掌心在我的腳背揉著，還不時溫柔的看看我有沒有很痛。
痛其實是有一點痛啦，但給Fiona柔軟的小手揉著，我就舒服得差點要呻吟出來了。
就在我享受著時，咔喳一聲，房門突然打開了。
「咦? 」小惠和Fiona同時發出了疑問的聲音。
『仆街啦！小惠做咩返咗嚟呀? 咁Fiona咪知小惠住喺度? 點算? 點算? 』
我心裏著急，一臉惶恐的瞧向小惠。
小惠好像猜到了發生甚麼事，若無其事的問Fiona﹕「Fiona你做咩喺度嘅? 仲要同個衰人捽腳添呀? 呢啲人駛乜對佢咁好喎。」
Fiona笑了笑﹕「呀Sam佢受咗傷唔方便嘛。」頓了頓之後，奇道﹕「點解小惠你會喺度嘅? 」
怎麼辦? 怎麼辦? 怎麼辦?
我的背上已經滲出了冷汗……
小惠若無其事的走到床邊，拿起了床上一些化妝品﹕「無呀，我問roommate借啲嘢，佢話擺咗上嚟，咁我咪問樂言借匙卡上嚟攞囉。」
噢小惠！我對你佩服得五體投地，在這麼短的時間竟然知道問題的癥結所在，還想出了一個完美的藉口！
Fiona還是一臉疑惑，我馬上解釋﹕「小惠個roommate就係樂言個女朋友Kitty呀。」
Fiona恍然大悟。
「我唔阻你哋啦，拜~」小惠說罷就離開了。
「唉……唉哎……」Fiona不知在想些甚麼，突然揉得很用力，我忍不住叫痛。
Fiona一臉歉意﹕「呀……對……對唔住呀……好痛呀? 」
我馬上道﹕「唔係呀，越痛啲瘀先散得越快㗎嘛。」
Fiona聞言馬上更加用力，挑皮的笑道﹕「係咪咁呀~」
「呀……痛……痛痛……」我面容扭曲，真心道。
Fiona微微一笑﹕「好啦，差唔多啦，你自己臨瞓再捽吓啦。」說罷走到廁所洗手。
「係呢，肚餓未呀? 一齊食飯啦！」我見已經是午飯時間便說。
Fiona皺一皺眉﹕「你咁樣點落去食飯呀? 」
我狡猾的笑道﹕「有你扶我嘛，怕咩啫? 」
Fiona俏臉一紅，「哼」一聲，然後沒作聲就伸手扶起我。
我被Fiona攙扶著慢慢走到樓下的宿舍飯堂。
Fiona讓我坐下之後道﹕「你想食咩呀? 我去買喇。」
我聳聳肩﹕「我無所謂呀，是旦得啦。」
Fiona笑道﹕「咁我真係是旦買㗎啦。」
「得啦！信得過你喎，快啲去啦~」我推了推她。
Fiona走開後，我馬上whatsapp給小惠。
「我哋走咗啦，你可以返房啦」
想了一想，又再發多一個訊息。
「頭先唔該哂你」
我等了一會，Fiona就捧了兩碟燒味飯回來。
我看罷笑了笑﹕「做咩呀? 你好鐘意食燒味㗎? 」
Fiona臉紅了一紅﹕「唔……唔係呀，我諗住你哋啲男仔應該鐘意食咋，我今日又有啲想食叉燒喎，你ok嘛? 」
我搖了搖頭﹕「唔ok呀。」
Fiona大急﹕「吓? 咁……咁點算呀? ……」
我看著她著急的模樣，笑道﹕「係我個肚餓到扁哂唔ok呀，快啲坐低食啦！」
Fiona白了我一眼，就坐了下來。
我伸手想拿起一碟飯，啪的一聲，Fiona伸手打了我一下。
我愕然的看著Fiona，她撇撇嘴道﹕「你頭先話唔ok嘛，而家無得食。」
「吓? …………」我放下手，一臉饞嘴的看著她。
Fiona吃了兩口，偷偷望了我一眼，忍不住笑了出來﹕「好啦好啦，比你食啦，你個為食樣真係好衰呀！」然後將叉燒飯遞給我。
我看了看，將叉燒都送到她的碟子，吃起白飯來。
Fiona吃了一驚﹕「做咩呀? 你唔鐘意食叉燒呀? 」
我嘴裏含著一口飯，模糊的道﹕「你鐘意食呀嘛。」
Fiona笑道﹕「傻瓜，我邊食得哂呀。」說罷將大半的叉燒給了我，又夾了些雞給我。
「你夠唔夠呀? 」我見她夾了很多雞給我，我又將叉燒夾回給她。
Fiona嗔道﹕「好啦，唔好再夾嚟夾去啦！你睇吓我哋碟飯！」說罷指著枱上亂七八糟的兩碟飯。
我倆一起看了看兩碟叉雞飯，都忍不住哈哈大笑。
我咬了一口叉燒，道﹕「係呢，你有無興趣去睇雀呀? 」
Fiona聞言興奮起來﹕「有呀！不過問過Mandy同小惠，佢哋又話對戶外活動無與趣，都無人陪我去……」說罷又一臉失望。
『小惠上次同我去不知幾興奮！唔通佢係專登拒絕Fiona，等我可以單獨約佢? 』
我沒有想太多，馬上打蛇隨棍上﹕「而家冬天，天氣涼涼地又無蚊，不如我哋去濕地公園睇囉！」
Fiona想了一想，突然臉上泛起紅暈﹕「哦……好呀……」
「咁你有無day off呀? 我諗閒日去會無咁多人。」我早知道Fiona在星期五day off，所以我也調到跟她一樣。
「星期五。」
「咁我哋下星期五去啦，要等我隻腳好返。」我指一指受傷的腿。
Fiona微笑﹕「好呀。」
*****************
「咦? 點解係你嘅? 」樂言開門看到我訝異的道。
「呀Sam整親隻腳，唔方便落嚟囉，我咪幫佢攞囉。」我解釋道。
「哦~」樂言大有深意的看了我一眼，又道﹕「你入嚟先啦，我去攞枝跌打酒比你。」
我給他看得不好意思，「嗯」一聲就走進了房間，默默的站在門口位置。
「Hello！Fiona。」Kitty跟我打招呼。
「Hello！Kitty。」我禮貌上回應了一下。
我瞄了一下房間，Kitty坐在左邊的床上，那就是她的宿位吧。跟樓上樂言的宿位的色調都差不多，但卻整齊得多了。
我心裏暗笑，難道Kitty將所有雜物都放上去了嗎?
再看一看右手邊，無論是床單的色調，還是書桌上簡潔的東西，都不像是一個女生住過的痕跡，反而跟Sam的很相像，像是男生住的，Kitty的roommate是男生嗎? 沒可能吧? 還是只是個很男性化的女生?
對了，我想起了剛才在Sam的房間，在樂言書桌找跌打酒時，看到桌子上有一本只有Econ才需要修讀的課本，樂言跟Sam都是讀Account的，難道是Kitty的? 沒可能吧? 就算她是Year2或是Year3的，我也應該知道啊！
「係呢，Kitty你讀邊科㗎? 」還是確認一下吧。
Kitty微笑道﹕「我讀中文㗎。」
中文? 中文……那麼，那本書的主人是誰? ……
「Fiona，跌打酒呀。」樂言的聲音打斷了我的思維。
「哦，唔該，咁我走先啦。」我有點心不在焉。
「係呢，呀Sam無咩嘢嘛? 」樂言問道。
「無，隻腳瘀咗，唔係好方便行路囉。」
樂言笑道﹕「咁麻煩你幫我睇住佢囉喎，拜拜~」
「吓? ……哦……拜拜……」我有點搞不清楚狀況就離開了。
回到房間，我輕輕的幫Sam揉著腳背，心裏泛起了淡淡的幸福感覺。
我是怎麼了? 剛才硬是要幫Sam揉腳背……我……我是喜歡了他嗎?
想到這裏，我不禁臉上一紅。
胡思亂想之際，房門突然打開。
小惠? 怎麼她會進來的? 找Sam嗎? 但她怎麼會有匙卡?
小惠解釋是來跟roommate借點東西，才向樂言借了匙卡，原來她就是Kitty的roommate。
那麼說，那個很男性化的宿位就是小惠的吧?
我想來想去都覺得兩者很不協調，突然我又想起了樂言書桌上的那本Econ課本。
……Sam和樂言是roommate，小惠和Kitty是roommate，樂言和Kitty是情侶，小惠的宿位佈置很男性化，樂言的書桌上有一本Econ課本……
「唉……唉哎……」Sam叫起痛來。
我想著這些事情，一不小心就用錯了力道，我馬上一臉歉意的道歉。
幫Sam塗了跌打酒之後，我便扶著他到樓下的飯堂吃午飯。
「小姐，請問要啲咩? 」
樂言和Kitty是情侶，那麼……若果樂言和小惠掉轉了房間的話……
「小姐，請問要啲咩呀? 」收銀員大聲了一點再重覆問我。
我醒悟過來，馬上道﹕「A……A餐同B餐呀唔該。」
拿著收據，走到櫃台前，我將收據給了服務員，不久他就放了兩碟燒味飯在我的盤子上。
『吓? 我買咗兩碟燒味飯呀? 』我看了看收據，寫著叉燒飯，油雞飯……
還好Sam沒有挑剔甚麼，還吃得津津有味，而且他以為我真的想吃叉燒，將所有叉燒都給了我，我心裏馬上一甜。
他是在對我好嗎? 但上次party時他也將蛋糕都給了小惠啊，而且……上星期又在青衣城看到他跟小惠牽著手……說起來，剛才小惠進房間時看到我雖然很驚訝，但卻沒有表示甚麼醋意，若果Sam真的跟她在拍拖的話，怎麼可能甚麼反應也沒有。但是有時小惠看著Sam的眼神，又好像很喜歡他的樣子，到底小惠對Sam……
*****************
我心情愉快，吹著口哨回到房間。
小惠瞄了我一眼﹕「點呀? 咁開心? 隻腳無事啦? 」
聽她提起傷處又馬上痛起來﹕「仲好講，駛唔駛踩得咁大力呀? 」
小惠白了我一眼﹕「唔大力啲點比你呃到Fiona扶你返嚟，仲同你捽腳呀！」
的確是，這些全靠小惠，所以我也不好意思說些甚麼。
我「哼」一聲﹕「嗰一腳就算數。」我頓了頓，又道﹕「乜你同嗰條友好熟咩? 一落堂就同人走咗去? 去邊呀? 」
小惠瞪著我﹕「人哋叫呀Roy呀！」頓了一頓，又幽幽的道﹕「我同人去邊關你咩事啫? 你都唔理我！」
我氣了上來﹕「我哋唔係講好咗咩，你唔可以同其他男仔行得咁埋個喎！」
小惠不屑道﹕「傾兩句，食個lunch就叫行得埋呀? 你呢啲咩準則呀? 」
我有點不可理喻﹕「總之……總之嗰個咩Roy就唔係好人啦！」
小惠嘲弄道﹕「你連人哋個名都唔知就知佢唔係好人喇? 你都幾犀利喎！」
我急得滿臉通紅﹕「總之……總之……」
小惠沒讓我說下去，揮了揮手﹕「係好人壞人我自己識睇，唔駛你教我，我去上堂啦。」言畢就拿起手袋離開了。
我頽然的躺在床上，想著剛才的事。我也不知道為何每次看到小惠跟其他男生走近，我的反應就這麼過敏。聖誕party那次的Michael也是，今天的高大衰也是，心底心處總是有一絲絲的酸味，是醋意嗎? 我搖了搖頭。不！我喜歡的是Fiona，而且小惠是將來的我的老婆啊，朋友妻尚且不可窺，何況是自己的? 甚麼嘛，將來的自己不就是自己嗎? 唉……我在想些甚麼? ……
我在雜七雜八的想著，也是不得要領，唯有放棄。
未完待續
注意：此文章排除於CC BY-SA 4.0條款以外，版權歸原作者（羊先生）所有。
未經作者同意，任何人不得冒名、修改、重製、剽竊、抄襲、仿作、轉載文章至其他地方。
