「Hello?」
「喂﹗」
呢一套開場白，經常都會嚇到人依嘩鬼叫 — —
因為開親聲我都係喺人側邊。
係有心？定係無意？我係無心，但有意。
或者換個角度講，我係有意嚇人，但又發現自己力不從心。
我係喺主題樂園扮吸血殭屍嘅，即係專响暗角伏人果種。
我嘅職責就係嚇人。基本上，季度一開始每日都會喺同一段時間、同一個位置，做同一個動作 — —
就係喺有人經過之後，從睇落係牆嘅一塊黑布後面行出嚟：「Hello?」
當果個人或果批人停低，我都係喺旁邊大聲嗌「喂﹗」，佢哋見到我一身吸血鬼嘅造型，佢哋都會不約而同咁尖叫、狂呼……
「嘩，頭先真係嚇撚死。」目送住一班被驚嚇到失笑嘅年青人，心裡頭嘅滿足感就會一湧而上。
無錯，我選擇做呢份外快唔多唔少都係為咗滿足感。要賺得多錢，或者無咁辛苦嘅part time 出面大把，當初揀份工都係為咗喺呢個沉默都市裡面，帶嚟少少生氣同驚喜。
啲人成日都話人生匆匆幾十年。其實過得順遂嘅話就話好快過嗟，但唔順心嘅話莫講話幾十年，十幾年都好長。既然係咁，又何必忍？
但時間耐咗，果份新鮮嘅感覺就會盲目，甚至會懷疑自己係咪真係做到想做嘅嘢呢﹖
有次我遇到一個人、一個普通睇落廿零歲嘅後生仔。佢嘅反應唔係不屑亦唔係羞辱，但喺當時好震撼到我：
「喂﹗」
「喂。」居然一啲驚嘅反應都無，仲伸手拍拍我膊頭，「辛苦晒巴打。」
「唔⋯ 唔辛苦。」一時間，反應唔好嘅我都唔知點應佢好，只係講出尚算由心嘅一番客套話。
佢按住我兩邊肩，垂低頭面向下咁停咗三秒，然後轉身，頭也不回咁就走咗。
我一邊目送住佢身影離開一路諗，到底扮咗吸血鬼咁耐有邊次係堅嚇到人？定其實只係啲人自己嚇自己？定係佢哋根本就連少少嚇親都無，只係純粹為咗配合環境而俾啲反應？
諗到呢度我都覺得自己諗多咗，但我又的確諗唔到一個滿意嘅答案。
* * *
放咗工、落咗妝，我就變番做一個毫不起眼嘅頹廢毒撚。
搵錢唔多、靠打幾份散工過活，要同一屋家人父母細佬妹住公屋嘅香港人，可以有幾起眼﹖
由於打散工過活，我連夜更都會接埋，生活時間都唔定時，返到屋企，家人都已經訓咗，更加唔好話約朋友，根本就唔到時間。
除咗返工之外嘅生存活動（即係所謂生活）就只有：搭車打機、返歸打機、入廁所打飛機。
三十歲人，無樓無車無女無雞脾無前景，睇唔到未來，亦唔見得咁落去有咩意義。
唯獨扮殭屍呢份散工，係我同他人互動嘅一道橋樑。
可惜個活動時間好短，過咗十月就告一段落。
正想抽番口煙、搵煙之際，我發現套戲服褸袋裡面有張卡片：
Ten Thousand Things House Personnel Consultancy
萬事屋人事顧問
張卡片係邊個漏低嘅呢？
* * *
十一月三號，今日係我新工第一日上班，title 係接線生。
「Hello! yes, how can I help you?」
「喂? 請問有咩可以幫到你？」
接咗半日電話都仲好精神，感覺呢份正職可以做得長。
Fin.
