「咩位置呀？」我對住手機內嘅你問。
「就到喇！」你氣喘喘咁答，「幫我叫定嘢飲喇！」
「你上到嚟都變凍飲加兩蚊喇！」
「叫定喇，上到嚟就啱啱攤到和暖好入口。」
「妖！快啲呀！成日遲到要我等你。」轉身向茶餐廳侍應招手道，「伙記！兩杯熱茶走！」
侍應舉手點頭，大叫道：「收到！」
唔夠十分鐘，兩杯茶走送上餐桌。你仍然未到。
我攞起支不鏽鋼茶羹開始攪杯茶走。其實我對茶走麻麻，但你話過呢間茶餐廳嘅茶走茶味足，奶香滑，再加上一點煉奶嘅點綴，係你飲過最好飲嘅茶走。
所以，每一次我都會陪你飲。
縱然我比較喜歡飲 Cafe Latte。
茶走嘅白煙消去之時，你終於上氣唔接下氣喺我對面坐低。
二話不說，你大口飲咗半杯茶走。
「啱啱好！夠暖、夠香、夠滑！」
「慢慢飲喇……」我勸道。
「時間唔多喇，」你再飲一啖茶走，「陣間要陪佢揀菜單。」
「得喇得喇……」我攞部手提電腦出來，「俾個最終版你睇。」
揭開部電腦，等緊開機嗰時，我問：「依家武漢肺炎咁嚴重，點解仲要搞婚宴？」
「唉……」你將杯茶走飲淨最後一啖。無攪勻就會成口煉奶嘅最後一啖。明明攪好就可以成杯飲哂，但你無一次攪勻。
「呢啲嘢一世人一次，總會想搞嘅……」
「係啫……但人命攸關。一個中招就惹到全檯，尤其啲老人家。」
「唔通叫人哋擺低禮金，影完相後叫佢哋攞嘢食走咩？」你嘆一嘆氣，然後半開玩笑道，「再者，嗰班廢老中咗招咪仲好！」
「雖然你兩個同一陣線，但話哂都係親家，起碼要對廿三十年，咁講好似過咗火……」講完啱啱好搵到條片，立即將部電腦轉到你面前俾你過目。
「中咗咪唔使對囉。」你開始播婚禮用嘅影片，「唔似得你，咁就對咗廿年。」
「你咁講，人哋以為我同你有嘢……」我轉頭望向其他地方，但正在注視短片嘅你一啲都聽唔到。
「你睇下呢張相！」你將電腦轉到大家都睇到嘅位置，「呢次真係好多謝你。無你借到架車，又做我司機，我肯定唔會咁易告白成功。」
「仲要做埋你哋嘅攝影師呢……」我望嗰張你開心到跳起，而佢含羞答答低頭揸住束花嘅相，回憶起當日嘅情況。
「你睇你睇！」短片已經去到另一張相，「唔係你教我整呢個蛋糕，都氹唔到佢嗰次生日咁開心！」
我見你一路開心一路睇，自己卻愈來愈失落。
你永遠唔會知道，架車係我偷偷地未問過我老豆就揸出嚟，返到屋企仲被佢打咗鑊甘。
你永遠唔會知道，個蛋糕係我花咗幾日用心設計，失敗咗好多次先整到咁靚，用嚟慶祝你生日。
你永遠唔會知道，暗戀好似武漢肺炎；就算病好痊愈，身體永遠帶住呢個病毒，隨時復發。
而你更加唔會諗到，十幾年前我已知我確診了。
「我要走喇，」你睇完條片，望望手錶，「嗰日記住早啲到，呢餐入我數。」
「知道喇，」我擠出一個微笑，「我會好好準備。」
你攞走張單，埋嚟大力拍咗我一下肩膊。
「我就知道搵你做伴郎係最佳選擇！」
