你講我聽.我寫你看

我老婆教我追女仔

我老婆教我追女仔(廿)

講故佬 我老婆教我追女仔

講故佬 我老婆教我追女仔

注意:此文章排除於CC BY-SA 4.0條款以外,版權歸原作者(羊先生)所有。
未經作者同意,任何人不得冒名、修改、重製、剽竊、抄襲、仿作、轉載文章至其他地方。

第廿章
我終於回復了正常生活,雖然我還是不時想念著小惠,但我現在卻有一個目標,就是努力的裝備自己,讓我重遇小惠的一刻能給她更大的幸福。
不知不覺又到了sem break,我又在努力打工。某天上午,正當我剛回到公司時,樂言打電話給我﹕「喂死仔!喺邊呀? 我到咗啦喎!」
我一頭霧水﹕「吓? 去邊呀? 我今日約咗你咩? 」
樂言訝道﹕「你講咩呀? 今日Fiona去英國讀書喎!你唔係唔知呀? 」
我大驚﹕「吓? 點解無人話我知㗎? 」
只聽得樂言跟身旁的人說話﹕「你又話呀Sam知嘅? 」
Mandy的聲音傳來﹕「係Fiona唔比我講㗎,費事……」
我聽到這裏,馬上對著電話大喊﹕「我而家即刻過嚟!幫我拉住Fiona唔好比佢入閘!」然後馬上跟上司請了半日假。
還好我在九龍站上班,要去機場還不是很遠。我馬上跳上了機場快線。途中我收到樂言的訊息﹕「快!Fiona 11點幾機,佢就快入閘啦!」
Fiona要到英國讀書,怎麼沒聽她說過? 她要去多久? 甚麼時候回香港?
我在列車上焦急的想著,雖說機場快線是真的很快,但我還是嫌它速度太慢了。

*****************
「女呀,爹地媽咪唔送你入閘啦,你自己小心啲啦!」媽媽柔聲道。
「嗯,你同爹地保重啦,我放假就會返嚟啦。」我擁抱著媽媽道。
「你小心啲啦。」爸爸道。
我親了爸爸臉頰一口﹕「知道啦。」
嘉寶幫我拉著行李﹕「爹地媽咪你哋去返工啦,我送家姐得啦。」
媽媽道﹕「好啦,咁拜拜啦,到咗記得打返嚟。」
「知道啦,拜拜~」我跟父母揮手道別,然後跟嘉寶一同走進離境大堂。

Check in後,Mandy和樂言也剛剛到了。
只見他們好像爭論著甚麼,到他們走到跟前,我見樂言好像想跟我說甚麼,Mandy卻馬上捏了捏他的手臂,樂言馬上將快說出口的話吞回肚子裏。
「嗨!Fiona,嘉寶。」Mandy跟我們打招呼。
「Hello!Mandy姐姐。」嘉寶熱情的挽著Mandy,又瞧了瞧樂言,問道﹕「Mandy姐姐,你男朋友呀? 」
樂言向嘉寶笑著打招呼﹕「係呀,我係Mandy男朋友,我叫樂言呀!」
Mandy白了樂言一眼,轉向嘉寶道﹕「唔駛理呢個大白痴。」
我笑道﹕「你哋仲好似以前咁咁鐘意鬥氣,其實我一早就估到你哋會喺埋一齊啦!」
Mandy臉紅紅﹕「咩……咩呀!鬼同佢喺埋一齊呀!」
樂言一把抓著Mandy的手,嘻皮笑臉的道﹕「哦? 乜我哋唔係喺埋一齊咩? 咁尋晚同我打車輪嗰個靚女係邊個嚟㗎? 」
Mandy羞得滿臉通紅,一下子摔開樂言的手,走過來拉著我走﹕「我哋去食早餐,唔好理個大白痴!」
我心裏暗笑著,希望他倆可以永遠這樣下去。
我想起了Sam,我沒有告訴他我會到英國讀書,就是不想面對和他離別的情景,我怕會捨不得他……

吃過早餐後,差不多是時候入閘了,我們走到離境閘口。
「家姐,返嚟記住要買嘢比我喎。」嘉寶擁抱著我說。
我捏了捏她的鼻子,笑駡﹕「剩係掛住買嘢!」
這時候Mandy走上前擁著我道﹕「得閒whatsapp傾偈啦,仲有放假返嚟記得搵我哋呀!」
「知道啦,祝你同樂言……」然後我微笑不語。
Mandy雙頰緋紅,轉頭望向樂言,卻見他在東張西望。
Mandy拍了拍樂言的手臂道﹕「喂!你望咩呀? Fiona入閘啦。」
樂言轉個頭急道﹕「吓? 咁快? 等……等陣先啦!」然後又東張西望。
樂言突然向一個方向揮手,喜道﹕「到喇到喇!」
我望向樂言揮手的方向,只見一個人飛奔跑過來。那個人大喊﹕「Fiona!等等呀!唔好走住呀!」
Sam?
*****************

我跳下列車,火速跑到離境大堂的出閘位置。幸運地,我在遠處已經見到樂言在跟我揮手,我馬上大喊﹕「Fiona!等等呀!唔好走住呀!」
我跑到他們跟前,不斷的喘著氣。
樂言笑道﹕「你終於趕到啦,巴打。」拍了拍我的肩膊道﹕「最後一幕交比你啦。」然後就牽著Mandy走遠了。
嘉寶也笑道﹕「我就奇怪點解Samuel你無嚟,原來主角真係要最後先出場!」然後笑著跟Fiona說﹕「家姐,比個浪漫嘅goodbye kiss嚟睇吓呀!」
Fiona紅暈滿臉,嗔道﹕「你喺度亂講咩呀!」然後作勢想打嘉寶。
嘉寶笑著躲開,走過來跟我說﹕「家姐交比你啦,Samuel。」然後跟在樂言他們身後,在遠處看著我們。
我走近Fiona,默默的看著她,有點不知所措。Fiona也只是默默的看著我,沒有說話。
過了一會兒,我才開口道﹕「點解……咁突然嘅? 」
Fiona微笑道﹕「其實爹地問咗我好耐啦,我係呢排先決定過去。」
我遲疑道﹕「係因為……我? 」是因為我嗎? 是因為我喜歡了小惠,沒有跟你在一起,你才下定決心到英國讀書嗎?
Fiona戳了我胸口一下,笑道﹕「你唔好以為自己真係咁重要先得㗎!你……你只係我好……好朋友咋……」說到後面,她已經眼紅紅的,眼眶內填滿了淚水。
我不知道說些甚麼才好,看見她楚楚可憐的樣子,忍不住上前替她抹去眼淚,歉疚道﹕「對唔住呀,我……」
Fiona的淚水已經滾滾而下,輕輕搖頭道﹕「你呀…….你無對我唔住呀……」然後又笑道﹕「你要同我等到小惠返嚟呀!如果比我知道,你中途放棄去追第二個女仔,睇吓我會唔會放過你!」
我用力的點了點頭﹕「嗯!」
我倆沉默了一會後,Fiona低頭道﹕「我……我要走啦……」
我依依不捨﹕「你……保重啦……」
Fiona抬起頭紅著臉說﹕「Sam呀……我可唔可以攬一攬你呀? 」
沒等我反應過來,Fiona已經撲進我的懷裏。
我怔怔的站著,感到Fiona在我胸口抽動。一會後,Fiona放開了我轉身離去,才走了幾步她又回頭,滿臉淚痕的微笑道﹕「多謝你呀!」然後就轉身入閘。
我獃獃的看著Fiona消失在眼前,然後發現胸襟沾滿她的淚水,心裏百感交雜。
若果小惠沒有出現,我想我會一直喜歡Fiona吧!但若果真的是這樣,我能追到Fiona嗎? 我弄不清這個因果關係……
我低下頭,茫然的轉身離開。

未完待續

注意:此文章排除於CC BY-SA 4.0條款以外,版權歸原作者(羊先生)所有。
未經作者同意,任何人不得冒名、修改、重製、剽竊、抄襲、仿作、轉載文章至其他地方。