你講我聽.我寫你看

我老婆教我追女仔

我老婆教我追女仔(二)

講故佬 我老婆教我追女仔

講故佬 我老婆教我追女仔

注意:此文章排除於CC BY-SA 4.0條款以外,版權歸原作者(羊先生)所有。
未經作者同意,任何人不得冒名、修改、重製、剽竊、抄襲、仿作、轉載文章至其他地方。

第二章
「喂!Sam,睇吓!靚女呀!」樂言用手肘撞了撞我的手臂道。
我們現正在上Year1獨有,每週一次的P.E.課,我們選修的是籃球。我們一大班男生熱身過後正在無聊的射籃。
「邊度呀? 」自從我們知道自己身處侏羅紀公園之後,我們已經放棄吃窩邊草,改為出外狩獵。而P.E.課正是一個大狩獵場,因為全校的Year1也有機會一起上課。
「哩!兩點鐘方向,淺啡色頭髮紥馬尾,眼大大嗰個呀!」
那少女剛好望向我們的方向笑了笑,我馬上知道樂言說的就是她,因為剎那間,那少女像是發射出金光,除了她外,我眼中甚麼都看不到,她一舉手一投足,都吸引著我的視線,牽動著我的情緒,我知道我已經被愛神邱比特的金箭射中了!
噗嗵…噗嗵…噗嗵…噗嗵…我感到自己的心臟劇烈跳動著。
『唔通? 呢啲就係一見鐘情? 』我呆呆的看著她,樂言叫我甚麼我也聽不到。
嘭!
…鳴……好痛!誰? !誰用籃球擲向我的俊臉? !
「叫咗你睇波㗎啦!掛住目及女!」樂言笑著將我扶起。
「無…無呀……見真係幾靚望多兩眼咋嘛…」我有點面紅耳熱,尷尷尬尬的道。
樂言似笑非笑的看著我﹕「無? 咁就去打波啦!佢哋話猜隊打半場呀!」
我給他看得混身不自在﹕「打…打咪打!驚你呀!」
結果我整堂課吃了四次波餅,傳球失誤了十次,大針了五次,走步了三次,還要踩了一次波車。
樂言恥笑道﹕「嘿嘿嘿!你今日表現好好喎!仲咁有娛樂性添!」樂言那隊因為我的「超水準」表現而輕鬆勝出。
我窘道﹕「…超!……讓…讓你咋!費時你輸到喊啦!」實情當然是我鬥波時左顧右盼,不斷尋找那少女的倩影。
樂言意味深長的看了我一眼﹕「落堂啦!返Hall未? 」
「行…行啦。」
離開體育館時,我四處張望希望找到那少女的蹤影。
「唔駛搵啦,人哋行咗去嗰邊呀!」樂言指著舊校的方向。
「咩…咩呀!我睇吓仲有無其他靚女咋!」我匆忙找了個藉口掩飾。
樂言邪笑道﹕「okok,咁而家返Hall未? 定係你要去舊校嗰邊睇吓仲有無其他靚女? 」這個臭小子不忘挖苦我一番。
我瞪了他一眼,然後逕自走在回宿舍的路上。
「喂喂!講吓笑啫!咪咁小氣啦方丈……」樂言快步從後追上來。

『佢…佢叫咩名呢? 佢讀邊科嘅呢? 如果係BBA就好啦!咁我有啲lecture大堂都有機會見到佢喎。』
『一個禮拜先見到佢一次,點樣識佢呢? 』
『直接過去問佢咩名? 然後再攞電話? 會唔會嚇親人呀? 』
回到房間,我就一直呆呆的坐在書桌前,托著下巴沉思。
!」樂言突然在我耳邊大喊。
我嚇得跳了起來,怒道﹕「嚇撚死咩? 駛唔駛咁大聲呀!我唔係聾㗎!」
他雙手攤開,一臉無奈的道﹕「我叫咗你十九幾萬次啦,我以為你真係聾咋!」
我知道不關他的事,平靜一下心情,然後問道﹕「咩事呀? 」
「呀君同Michael叫我哋出lounge打winning呀,你去唔去? 」
「我唔去啦,你哋打啦。」我揮了揮手道。說真的我現在可沒有心情打機。
樂言聞言看了我一眼,然後就逕自出lounge打機去了。
他離去後我又回到沉思之中,過了一會房門突然打開,Michael、呀君和樂言魚貫走進來。
我有點不解的看著他們﹕「你哋唔係打機咩? 」
「兄弟有事喎,點可以仲掛住打機呀? 」呀君笑道。
「無錯。」Michael托一托眼鏡。
我怒瞪樂言。不消說定是他將我今天的窘態說給這兩個傢伙知道。
樂言沒有理會我的怒氣,走過來搭著我的肩膊,邪笑道﹕「有咩心事要講比信任嘅人知嘛,鬱埋鬱埋對身體唔好㗎。」
我沒好氣的道﹕「你哋唔係我信任嘅人囉。」
樂言沒有生氣,笑道﹕「我哋都唔係你信任嘅人? 咁仲有邊個係? 」續道﹕「一睇你成個含春少女咁樣,就知你搭人糖啦!話哂我都有啲經驗,可以幫到你喎。」
我白了他一眼﹕「你就含春!」
但轉念一想,樂言現在有一個固定女朋友,呀君又曾經拍過拖,Michael雖然跟我一樣是張白紙,但正所謂三個臭皮匠,勝過諸葛亮嘛,說不定他們真的幫到我呢!
「咁…我而家應該點做呀? 」我忐忑不安的問道。
「簡單啦!直接去識人攞電話囉!」呀君直接道。
「吓? ……」我無語,開始有點後悔找他們幫忙。
樂言接著道﹕「識就係識…」
「不過又唔駛去到咁直接嘅。」他的樣子充滿信心。

又到了每個星期我最期待的P.E.課,一走進室內運動場我又開始搜索她的倩影。
找到了!找到了!嗯……她還是一樣的漂亮,一樣的動人……
「喂!咪眼甘甘咁望住人啦!因住嚇親人呀!一陣仲唔大把機會比你望到夠咩!」樂言拍了拍我的肩膊提醒我。
「係嘅係嘅!軍師大人!」我點頭哈腰道。
熱身之後,又做了一些老師指定的籃球基本動作,又到了自由時間。
樂言看到她和朋友坐在一旁休息聊天,給了我一個眼色,我就戰戰兢兢的跟他走過去。
「嗨!原來Mandy你都入咗BU呀? 咁啱大家又會上埋同一堂P.E.嘅? 」樂言坐下來跟女神的朋友搭訕。
「咦? 樂言? 你都入咗BU呀? 你而家讀邊科呀? 」Mandy是樂言的中學同學,還算談得上來。其實他上星期已經看到Mandy跟女神聊天,估計她們不是朋友也會是同學,所以才這麼有信心。
「我而家讀緊BBA-account呀,你呢? 」
「我讀econ呀,大家都係BBA喎!」
「哈,咁話唔定之後上lecture都會撞到喎!係呢,你隔離個靚女點稱呼呀? 仲唔快啲介紹比我識? 」樂言用眼神瞄一瞄女神。
Mandy白了樂言一眼道﹕「佢叫Fiona呀,佢係我econ嘅同學。」然後續道﹕「你仲係同以前一樣咁口花花喎!真係死性不改!」
樂言搔搔頭笑道﹕「哈哈!呢啲叫本性難移嘛。」
他向Fiona道﹕「Hello!我叫樂言呀。」
然後向Mandy和Fiona介紹我﹕「呢個係我同學兼roommate,Samuel。」言畢,他用手肘暗暗撞了我一下。
我馬上向Mandy和Fiona道﹕「你…你哋好呀!叫我Sam得啦。」我心跳開始加速。
「Hi Sam!我叫Mandy呀!」Mandy爽朗的道。
「你…你哋好呀!我叫Fiona。」Fiona靦靦腆腆的道。
噢!Fiona實在太可愛了!
接著樂言給了我一個眼色,就繼續跟Mandy聊天。他們聊的都是他們中學時的事情,所以我跟Fiona都沒法插口,這是樂言計劃好的,這樣我就能主動跟Fiona聊天了。
其實短短的數分鐘,我跟Fiona也沒能聊到甚麼,只是簡單的彼此認識一下。還好我有想過聊甚麼話題,不然跟她呆呆的一起坐著就真的尷尬死了。
片刻後,樂言撞了我一下﹕「喂!返去打波囉!」這也是他的策略之一,他說第一天認識人也不可能跟人聊數十分鐘吧。
「哦…哦,好呀!」雖然我有點不捨,但我的話題也差不多用盡了,再撐下去就要出糗了。
「咁…下次再傾啦。」我緩緩站起身,故作平淡的跟Fiona道別。
「嗯,下次再傾啦。」Fiona看了我一眼,淡淡的道。
我們跟她們道別後,就慢慢走回男生堆裏。
「喂!唔錯呀!同Fiona都傾得兩咀喎。」樂言搭著我的肩膊道。
「唉…你都唔知我幾緊張呀!又要諗話題,又要回應佢,又驚dead air喎……」我猶有餘悸的按著急促跳動的心口。
「定啲嚟,有我做你軍師嘛。嗱!你一陣打波記住記住唔好成日望嗰邊呀,你成日牛咁眼咁望住人,盲嘅都知道你對佢有意思啦!一陣嚇親人我就真係幫你唔到啦。」樂言頓了一頓,續道﹕「仲有就係一陣打波專心啲呀!你都唔想好似上個星期咁比哂啲『精彩球技』比Fiona睇啩? 雖然係好搞笑,但我諗無女仔會識欣賞囉!」
「知道啦,軍師大人。」我頷首受教。

課堂結束後,我們只是禮貌上跟Mandy和Fiona說了聲再見,就回宿舍了。
回到房間,樂言坐在床上跟我說﹕「嗱!今日有個好開始,就已經係成功嘅一半啦。」
「真係唔該哂你!如果唔係你我都唔知點開始第一步。」我衷心感激。
「屌!講呢啲!咪咁肉麻啦!」樂言一臉鄙視。
接著只見他眼睛骨溜溜一轉,有點不懷好意的看著我﹕「不過呢,如果你想多謝我嘅話,就幫幫我手啦。」
原來他看中了住在六樓的一個女生,想藉口今晚去幫女生一些忙,但又怕只得一個人去不好意思,想找我一起去壯壯膽。雖說他已經有女朋友,但反正他要喜歡誰是他的事,而且又幫了我這麼一個大忙,我自然樂意去助他一臂之力。

*****************

「P.E.堂真係好無聊呀……」我抱怨道。
Mandy用手肘撞一撞我﹕「唔係呀,你睇吓~」Mandy是我的Econ同學,是那種心直口快大剌剌的性格,遇到不平的事一定會說出來的人。所以雖然樣子漂亮,但好像還沒有那個男生敢惹她。
「睇咩呀? 」我望了望她。
「靚仔呀!」然後用眼神瞄一瞄籃球場中奔跑中的男生們。Mandy就是因為這個原因才會選讀籃球的。
「有咩好睇喎……」我噘著嘴道。
Mandy沒理會我,自顧自的欣賞。忽然有一把男聲朝我們的方向發出。
「嗨!原來Mandy你都入咗BU呀? 咁啱大家又會上埋同一堂P.E.嘅? 」一個高高瘦瘦的男生坐下跟Mandy說話。
Mandy訝道﹕「咦? 樂言? 你都入咗BU呀? 你而家讀邊科呀? 」原來是Mandy認識的。
之後他們就在交換近況呀甚麼的,我也沒留意他們說些甚麼,但突然就聽到我的名字。
「佢叫Fiona呀,佢係我econ嘅同學。」怎麼Mandy介紹我起來啦? 我看了Mandy一眼。
那個高高瘦瘦的男生向我打了個招呼﹕「Hello!我叫樂言呀。」
然後又介紹他旁邊那個靦靦腆腆的男生。
只見他臉紅紅的道﹕「你…你哋好呀!叫我Sam得啦。」
我不太習慣跟初相識的人打交道,也是靦腆的道﹕「你…你哋好呀!我叫Fiona。」
介紹過後,不知怎的Mandy就跟樂言自顧自的聊起來,而且還只是在聊他們中學時代的事情,害得我跟那個叫Samuel的男生呆呆的坐在一旁,氣氛真的是有夠尷尬的了!這個Mandy,也不照顧我一下,我還坐在旁邊耶!
Samuel好像也發覺不太妥當,於是打破了沉默。
「係呢,你讀Econ呀? 我讀Account㗎,大家都係BBA喎。」
「係呀? 咁我哋之後可能會一齊上lecture喎。」
就是這樣,我們聊起了上大學的事。
沒多久,他們就回去打籃球了。
他們走後,Mandy撞了我一下,笑道﹕「唔似你喎,啱啱識就同Samuel咁好傾。」
我嗔道﹕「一日至衰都係你啦!自己掛住同嗰個樂言傾偈,就咁賴低我同Samuel喺度。」
Mandy笑道﹕「咁比個機會你識吓男仔嘛,Samuel都唔錯呀,斯斯文文咁。」
我臉一紅﹕「留返比你自己啦,你唔係好鐘意靚仔咩? 樂言幾好呀,你又同佢咁好傾。」
Mandy臉色有點不自然,搖了搖頭﹕「人哋有女朋友啦。」
Mandy沒有再說甚麼,將目光投回籃球場。
我也順著Mandy的目光看著打藍球的男生,看到Samuel和樂言在場中追著球跑來跑去的,也不知為了甚麼,但他們一臉認真的樣子還蠻吸引的,或許我開始學懂欣賞一下了。

*****************

接著的兩個星期,還真的在一些lecture碰到過Fiona,不過我按照樂言的意見,只是跟她稍微交談一下,就沒有進一步行動。我倒是憋得很辛苦,有種眼看手勿動的感覺(其實我連偷看也不敢,怕給她發現了)。樂言說這個時期最重要,除非你俊比吳彥祖、C.朗等,否則一般男生(哼!甚麼一般男生? ),還是一步一步的跟心儀對象建立關係比較好。

又到了每個星期我最期待的日子了。
樂言道﹕「好,睇嚟你呢兩個禮拜都做得唔錯,上一堂見你同Fiona都有講有笑咁,睇嚟我哋今日可以再進一步喇!」
我喜道﹕「點…點樣再進一步呀? 」
「我哋今日落堂後試吓約佢哋一齊食lunch啦,我上個禮拜見到佢哋上完堂喺Hall can食飯,咁佢哋之後應該係無堂上嘅。」
我點頭如倒蒜﹕「好好好!我請我請!」
樂言笑道﹕「你剩係請我得啦。記住,一陣埋單你可以比錢先,但如果佢主動比返你嘅話一定一定要收。因為一個有家教嘅女仔,係唔會隨便接受普通朋友嘅恩惠。你夾硬要請嘅話,反而顯得你無事獻殷勤。」
我奉承道﹕「有道理有道理,果然係溝女達人!」我頓了頓,有點期望的看著樂言﹕「不過呢,如果可以有辦法攞埋佢電話呢,咁就perfect池喇!」
樂言想了想﹕「嗯…又唔係話無辦法嘅……」

就跟上兩個星期差不多,到了自由時間我跟樂言都會去跟Mandy和Fiona聊一會天。聊不到十多分鐘,我們又會藉口打籃球離開。絕對不讓Fiona覺得我很刻意的找她。
課堂終於結束,我的心情亦變得有些緊張。
「準備好未? 」樂言問我。
「o…ok。」我非常緊張。
他拍了拍我肩膊,笑道﹕「今次又唔駛你開口問,淡定啲喎。」
我們若無其事的走到她們身旁。
樂言語氣很隨便﹕「喂!你哋跟住要唔要上堂呀? 唔駛嘅話一齊食飯啦!」
Mandy看了看樂言,訕訕笑道﹕「同你呀? 我無乜興趣喎!」
我倒吸一口涼氣﹕『你唔係玩嘢呀? Mandy姐!』
「不過同Samuel食飯呢,就有啲興趣嘅。」她續道。
我暗呼一口氣﹕『真係比你嚇撚死……』
樂言面不改色,呵呵笑道﹕「其實我剩係想約Fiona,你都係搭單咋!」
只見Fiona俏臉一紅,然後Mandy怒瞪樂言﹕「你!……」
事情突然一發不可收拾,就在他倆吵架之際,我靈機一觸,向Fiona道﹕「睇嚟佢哋兩個嗌交可以嗌飽啦,不如我哋兩個自己去食囉。」
Fiona嫣然一笑,點頭和議﹕「好呀,咁換完衫我哋兩個喺樓下等啦。」
Yes!Fiona竟然如此配合我,令我不禁心裏暗爽。
然後我倆沒有理會吵架二人組,一起向更衣室那邊走去。
「喂喂!等埋我呀,Fiona!」Mandy見狀馬上追上。

「呀你個死仔吖!有番兩度喎!」樂言在更衣室讚賞我剛才的急才。
「小事小事!食飯食飯!」我不禁有點沾沾自喜。

我們去了宿舍那邊的一間台式料理餐廳,那裏適合三五知己一起吃飯聊天,比起校園裏所有飯堂的環境都好多了。
點餐過後,樂言跟我又天南地北的胡扯,不時逗得她倆花枝亂顫。
樂言見時機成熟,在桌下輕輕踢了我一下。
我會意,於是不經意的拿出電話,笑道﹕「我噚日睇到有段片好搞笑㗎,我比你哋睇吓。」說罷我將手機遞向樂言,示意他先看。
樂言配合的沒有用手接過手機,只是將頭移過來﹕「睇過睇過……」
果然,Mandy已經急不及待的將頭伸過來想一起看,不過因為她坐在我對面,所以顯然不成功。而Fiona的眼神也顯得十分好奇,只是她沒有像Mandy這樣心急而已。
樂言裝作不滿被Mandy騷擾﹕「唉哎你急咩啫? 睇完咪比你睇囉!」
Mandy怒瞪樂言,看來又想再次吵架。
我見狀馬上把握機會﹕「得得得!唔駛爭,你哋比個電話我,我開個group放上去一齊睇。」
如此這般,我就順利得到了Fiona的電話號碼了。
『Yes!搞掂!樂言條橋真係work喎!』
我興奮得暗地踢了樂言一下,想示意多謝他。
「唉哎!邊個踢我? 」Mandy站起身的怒道。
樂言有點愕然的看著我,我帶點歉意用眼神解釋踢錯了人。
「唔駛問一定係你啦!」Mandy指著樂言怒道。
「唉哎!sorry呀!頭先打波跑得攰得滯,搞到突然間腳抽筋喎。踢到你唔好意思囉。」樂言按捏著小腿,裝模作樣的道。
「你!………」結果這場午餐就在吵架聲中結束。

*****************

「Mandy呀,頭先做咩同樂言嘈得咁緊要呀? 成間餐廳啲人都望哂過嚟啦,我同Samuel不知幾尷尬呀!」我一邊和Mandy走向新校,一邊抱怨。
Mandy怒道﹕「你無睇到佢頭先個樣幾衰咩? 我肯定佢係專登踢我㗎!」
我沒好氣﹕「咁多隻腳喺枱底,點會專登踢到你呀? 佢唔小心啫。」
Mandy氣忿難平﹕「你唔見頭先佢約我哋食飯嗰陣幾串咩? 」
我平心靜氣道﹕「咁你開頭都串佢啦,大家都打個和啦,係咪? 」頓了一頓,續道﹕「我都唔明你兩個,有時傾偈傾得好地地,突然間又好似水溝油咁。」
Mandy突然轉變話題,不懷好意的道﹕「咁又係呀!點及得上你同Samuel咁夾啫!啲對白好似預先傾好咁!」
我耳根發紅﹕「咩啫!我哋都係想緩和吓氣氛啫,費事大家一齊食飯面阻阻咋!」
Mandy一臉古惑的看著我﹕「係咩~~」
我急得馬上轉移視線﹕「係…係呀!你同樂言呀,夠似電視劇嗰啲歡喜冤家啦!話唔定你哋最後會喺埋一齊添呀!」
Mandy臉色一黑,馬上道﹕「我閘住,我揀豬揀狗都唔會揀佢呀!」
這次輪到我不懷好意﹕「真嘅~~? 」然後一臉壞笑的看著她。
Mandy嗔道﹕「死妹釘吖!信唔信我吱你呀啦!」說罷伸手到我腰間。
我笑著驚呼﹕「呀!殺人滅口呀!」然後邊笑邊躲。
Mandy笑駡著的追上來﹕「咪走呀!」

*****************

「喂!頭先辛苦哂!」我拍了拍樂言的肩膊道。
「哎…小事啦。」樂言毫不介意。
其實我也不太明白樂言為何老是跟Mandy抬槓,不過這樣倒令到我有很多機會和Fiona交流。哈!我現在倒希望他們每次見面都會吵起來。
「呀……終於攞到佢電話啦!」我伸了伸懶腰,然後拿起電話想幹些甚麽。
我蠢蠢欲動的樣子給樂言看在眼裏,他冷冷的道﹕「你千祈唔好係咁send message或者打去呀!你哋而家只係普通朋友咋,cher得太勁會嚇親佢㗎!」
我笑了笑﹕「知道啦!我攞出嚟睇吓咋嘛~」
樂言作嘔吐狀﹕「頂!你知唔知你個樣好嘔心呀!」
我心情大好﹕「知喇知喇,你比我嘔心多陣啦!」
樂言無語的搖了搖頭。

於是乎在往後的兩個月,我閒時都會發些有趣短片給Fiona,上lecture碰到她又會約她去午飯或下午茶。當然我深明凡事太盡,緣份必早盡的道理,所以除了每星期P.E.課後的午餐約會,我只會每隔兩三天才跟她在whatsapp裏閒談一次,以保持適當的距離感。

「唉哎……下個week就考試啦,我d書仲未溫好呀,好多唔識呀!點算呀? >_<」Fiona whatsapp我。 「你未溫好邊科呀? 睇吓我幫唔幫到你? 話哂大家都係讀BBA」雖然我讀account,Fiona讀econ,但我們很多科目都是相通的。 「其實d econ呀,account呀,finance呀都唔係好明囉,咁我以前讀science都無讀過呢d嘅T.T」 「哈哈!咁你真係問啱人啦,econ,account呢d碎料啦,我AL都讀過哂啦,Year1嗰d好淺咋,我一講你就會明!至於finance,都係計數嘢啫,唔難唔難」我倒不是吹牛,我是真的有把握。 「教我!教我!」 我心裏暗笑﹕『求之不得啦!』然後回覆「好呀!幾時? 」 「聽日放學? 」 「聽日唔得」我想也沒想就拒絕。 「後日lunch time? 」 「都唔得」一樣想也沒想就拒絕。 「嗚……咁幾時呀? >.<」倒不是我明後天真的很忙,我只是想約她星期六,那就可以一整天陪著她。而且我也需要幾天時間火速復習一遍,免得屆時出醜。
「星期六朝早10點,圖書館,你ok嘛? 咁就可以同你溫成日啦!」
「嗯~好呀!^_^」
「YES!搞掂!」我高興得站在床上。
樂言見怪不怪的看了我一眼,又繼續埋首打機。
電話又響起,我看了看Fiona的whatsapp。
「咁我叫埋Mandy,你叫埋樂言,我哋四個一齊溫啦!我諗會有效率d呀!^_^」
「仆街啦!」我呼喊﹕「兄弟,救我!」我焦急的將電話塞到樂言眼前。
「冷靜!冷靜!」樂言按著我,拿起電話看著我跟Fiona的對話。
他沉思了一會,然後在電話上回覆。
「我問吓佢先,我再話你知。」
樂言將訊息發出後,抬起頭跟我說﹕「過一陣你再話佢知我ok可以去,但你喺嗰日朝早先同佢講話我臨時有啲事去唔到啦。」
我焦急道﹕「就算你唔去,咁Mandy去嘅話點算? 」
「放心啦!Mandy去唔到嘅。」樂言一副莫測高深的模樣。
到了星期五晚,我跟Fiona通電,確認了Mandy明天也會出現。我又找樂言求救,他只是向我大派定心丸,叫我放心。

星期六早上九時。
我睡眼惺忪的起來,看看樂言…嗯? 不在? 我昨晚睡時他還在打機啊。
我馬上沐浴更衣,出門時看到樂言給我的whatsapp﹕「兄弟加油!」
我滿臉狐疑,究竟樂言幹了甚麼可以令Mandy不出現呢? 還是他只是哄我? 我想來想去想不通。不管了,快要遲到了。
到了圖書館門口,我忐忑不安的按計劃whatsapp Fiona。
「喂喂,我去到門口啦。不過樂言頭先話有急事嚟唔到喎……」
「咦? 咁啱嘅,我今朝起身收到Mandy留msg,佢又係嚟唔到……」
噢!樂言你是神嗎!可以容許我成為你的信徒嗎?
「o…咁唯有我哋兩個自己………..」我邊打字邊笑出聲來。
「喂!做咩一個人喺度傻笑呀? 」Fiona原來已經悄悄的走到我身後。
我吃了一驚,馬上收起笑容轉身。只見Fiona穿著一襲吊帶粉色碎花及膝裙,外披一件纖薄外套,平時的馬尾不見了,變成了一條鬢辮側放在一旁,令她變得比平時更可愛動人,我不禁看得癡了。
Fiona噗哧一笑﹕「問你做咩傻更更自己一個人喺度笑呀,做咩又呆哂呀? 」
「無呀!睇到條片好搞笑咋嘛!」我甦醒過來,隨便說了個原因。
「我要睇!我要睇!」Fiona想搶我的電話。
「唔得!而家要開始溫書。」說罷我裝作正經八百的走進圖書館。

「我呢度唔明呀!」
「嗱,呢度係咁咁咁…然後係咁咁咁………」
我邊教導Fiona,邊欣賞她的側臉……
看著她清澈動人的大眼睛,顫動的眼睫毛,配著細長的蛾眉,還有小巧的鼻子和粉嫩的嘴唇,不禁令我心神盪漾。不論是緊皺眉頭時的苦惱樣子,還是淺笑時露出的小酒窩,都令我神魂顛倒,不知人間何處。還好這幾天我已經將考試內容溫習得滾瓜爛熟,才能在欣賞的同時,又能解答Fiona的疑難。
「呵欠…….」Fiona伸了個懶腰。
噢!美女打呵欠和伸懶腰也是動人心弦的!我又看得癡了。
「喂!你溫書溫到傻咗呀? 」Fiona伸手在我眼前揮了揮。
「啊…!係啦!好攰呀!」我裝作疲累的樣子。
「唉哎!原來已經7點幾啦? 不如我哋走囉。」Fiona看了看手錶道。
「啊好呀…係呢,你肚餓未呀? 不如一齊食飯啦? 」雖然我不是第一次邀約她,但我還是緊張得手心出汗。
Fiona側頭想了想﹕「唔啦,我諗我屋企煮咗我飯,下次先啦!」
「噢…係呀…咁下次先啦。」我難掩失望的表情。
我再接再厲﹕「咁我送你去地鐵站啦。」
Fiona笑了笑﹕「唔駛啦,呢度行去好近咋嘛。你教咗我成日都好攰啦,你返Hall抖吓啦。」
我呆了呆,不捨道﹕「哦…咁你自己小心啲啦。」
Fion笑道﹕「你都小心啲啦,拜拜~」說罷轉身離去。
「拜拜……」我對著她的背影道。
正當我轉身想黯然離開時,Fiona突然轉身向我大喊﹕「喂!考完試我請你食飯當多謝你啦!」
我呆了呆,然後馬上笑容滿面,揮手回應道﹕「你話㗎!考完試我就追你㗎啦!」
糟了!心底話衝口而出!希望她沒領悟到真正意思吧。
她好像沒甚麼反應…呼……還好。

*****************

我跟Samuel道別後就慢慢的走回家,想起剛才他說的話,我不禁耳根發紅。
「你話㗎!考完試我就追你㗎啦!」
他的意思是追我請他吃飯吧? 嗯!看他傻傻的樣子,應該就是這個意思啦,我想是我想太多了吧。不過,嗯…如果…他真的追我的話……
我搖了搖頭,拋開腦海中的胡思亂想,又想起Mandy的訊息,她究竟發生甚麼事呢? 早上打給她又沒能接上,留了言她又沒回覆,現在再試一次吧。
「你所打嘅電話暫時未能接通,請喺……」
還是和今早一樣,於是我又發了個訊息給Mandy。
「發生咩事呀? 成日都搵唔到你嘅,好擔心你呀!」
樂言跟Samuel說也是有急事來不了,這兩件事有甚麼關聯嗎?
想來想去想不通,回到家吃過晚飯後,才收到Mandy的來電。
Mandy歉意道﹕「Sorry呀,要你擔心。」
「傻啦,無咩事呀嘛? 」
「其實係我個best friend失戀,我尋晚走咗去安慰佢,搞到而家先返屋企。」
「哦,佢無咩呀嘛? 」
「而家好啲啦。」
「咁你都早啲休息啦,搞咗成日你都好攰啦。」
「嗯,咁返學見啦。」Mandy的聲音透出倦意。
「好啦,拜拜~」
才剛掛了電話,它又響起來了。
Samuel的訊息? 這個傻瓜又發甚麼好笑的東西來吧?
「哈哈……」怎麼他都能找到這麼有趣的東西啊? 他真是夠無聊的了。

*****************

回到宿舍,赫然見到一個女生在幫樂言按摩肩膊,而這個女生正是之前我們到六樓幫忙的那一位,即是樂言看上了的那個,看到他們的親密行為,我自然聯想到他們的關係了。
「返嚟啦。呢個係Kitty,你哋之前都見過啦。」樂言若無其事的道。
「嗨!你叫我Sam得啦。」我頓了頓﹕「我應該係叫你Kitty,定係…呀嫂……? 」
Kitty噗嗤一笑﹕「嘻…你叫我Kitty得啦。」
樂言向Kitty道﹕「你返去先啦,我一陣落嚟搵你。」接著Kitty就乖乖的離開了。
我用眼神問有關Kitty的事,樂言聳聳肩道﹕「啱啱同之前嗰個分左手……」我會意,只是想不到他這麼快將另一個泡上手。
「係喎,你點令到Mandy去唔到㗎? 」這個問題纏繞了我一整天。
「嘿嘿…….總之就山人自有妙計啦。」樂言得意洋洋。

考試週終於完結,sem break也差不多開始了,我在房中無所事事,唯有打機度日。
『唉…樂言個死仔就好啦,溫完書仲可以溫she,晚晚都有得同條女啪啪啪。我就剩係可以對住個keybroad啪啪啪……』話說樂言的新女友暫時沒有同房,所以他現在每晚都在女友房中過夜。
叮叮~電話訊息響起,我馬上拿起一看。
Fiona? 馬上打開看看。
「喂喂!做緊咩呀? (馬騮掩眼)」
「無呀……悶到個頭都生菇出嚟啦……」我還是像之前一樣,兩三天才會跟Fiona聊一次。
「我咪話過請你食飯嘅? 咁你而家嘗面嘛? 」
『嘗!嘗!我想即刻上你添呀!』當然我只是心裏想想。
「嘿嘿……好彩你自己提返起啫,如果唔係我都唔係幾好意思追你呀!(馬騮掩咀)」我又用一些曖昧言詞。
「哼!咁我而家咪自投羅網囉,得未呀? (憤怒眼)」
「得得得!唔好嬲唔好嬲(雙手合十)」
「咁聽晚7點又一城,ok? 」
「okok」
我馬上打電話給樂言。
「樂言樂言!聽晚我約咗Fiona食飯呀!」
「哦,係呀? 恭喜哂喎!」自從他有了新女友後,已經很少過問我和Fiona的事了。
「係呢…我係想問吓…你覺得如果我聽日同佢表白,會唔會成功呀? 」經過這兩個多月的相處,我覺得我在Fiona心目中的印象還不錯,而且我們一起時有說有笑,而且也有幾次單獨約會,我覺得成功機會還蠻高的。
「嗯……其實你一直都有keep住同佢傾偈,又周不時單獨同佢溫書呀,食飯呀咁,咁我覺得如果個女仔對你一啲好感都無嘅,佢唔會肯咁做囉,我都覺得有機嘅。」
「係? 」其實我也只需要一個認同而已。
「你有信心就去馬啦!你得嘅!」樂言鼓勵我。
好,我心中那團火已經燃起啦!

又一城,晚上七時十分。
「喂!sorry 呀,遲咗啲,等咗好耐呀?」Fiona歉意道。
「唔…唔係呀,我都係啱啱到咋嘛。」我當然不會說我六時半已經到了。
我頓了頓,續道﹕「咁…咁我哋而家去邊呀? 」我因為不斷想著表白的事,所以說話都變得有點結巴。
Fiona笑道﹕「去食飯囉!跟我嚟啦。」然後走在前面。
我亦步亦趨的跟著Fiona。因為腦中一片混亂,所以想不到甚麼話題,只能一直沉默的走著。
走著走著,Fiona突然一臉奇怪的看著我﹕「你做咩今日咁怪嘅? 係咪有咩事發生呀? 」
我不知所措﹕「無…無呀……」然後裝作若無其事﹕「我好怪咩? 邊度怪呀。」
Fiona道﹕「你平時好多嘢講㗎? 做咩今日咁靜嘅? 」
「無…無嘢呀。我…我肚餓咋嘛……係..係呢,我哋去邊度食飯呀? 」我嘗試拉開話題。
Fiona嫣然一笑﹕「咁我哋行快啲啦﹐喺前面咋。」然後三步并作兩步向前走去。
我們到了一間意式餐廳吃飯。而我一直也是忐忑不安,還好Fiona一直有一搭沒一搭的跟我聊天,不然那沉默的氣氛真的會讓人想自盡。用餐完畢,我慣性的拿出錢包想結賬。
Fiona伸手阻止我,噘著嘴道﹕「話咗今餐我請㗎嘛,你唔準比呀!」
「好好好……」我和應著她,但我還是伸手到錢包裏。
「咁你請我食飯,我請番你睇戲啦。」我拿出兩張一早預備好的戲票。
「唔得!」Fiona堅決的道。
「吓? …………」我拿著戲票的手無力的垂下,沒想到就這樣被拒絕了。
Fiona噗哧一笑﹕「我意思係今晚餐飯係多謝你嘅,所以你唔可以請我睇戲,我要比番錢你。」說罷拿走一張戲票,然後將鈔票塞到我手上。
我呆呆看著手上的鈔票,心想這個女孩實在太完美了!雖然漂亮,但不會恃美行兇,佔人便宜,而且平易近人,不愧是我夢寐以求的完美情人。
「行啦!開場啦!仲發吽竇!」Fiona的聲音將我拉回來。
接著整套戲我都在胡思亂想,跟本不知道戲裏說些甚麼。幸而 Fiona看得很集中,否則她跟我討論劇情的話我也不知道怎麼回答。
看完戲後,我道﹕「夜啦,我送你啦。」我嘗試把握最後送她回家的機會表白。
Fiona側頭想了想﹕「嗯……好啦,比你送一段路啦。」
然後我們慢慢的走著,其間有無數的機會,但我就是開不了口,讓她知道。
不知不覺,已經走到了分手的地方。
「好啦,你就送到呢到啦。」Fiona在一個岔路跟我說。
「Fiona,我……」我還是猶豫不決。
「嗯? 」Fiona瞪著大眼睛看著我。
「無…無呀,你小心啲啦,拜……」唉……還是說不出口。
「你都小心啲啦,拜拜~」Fiona揮手道別後就轉身離開了。
我看著她慢慢遠去的背影,心裏萬分著急,唯有馬上打電話給樂言。
「點呀?表咗未呀?」電話傳來樂言的聲音。
「未呀,佢啱啱走咗。我而家好淆呀!究竟表唔表好呀?」我慌張的道。
「嗱!你諗吓喎,講咗,機會係五十五十。唔講,機會係零。」樂言冷靜的道。
我有如當頭棒喝,馬上道﹕「噢!明白哂,thank you你,巴打。」我那團火又被燃起了!
機會嚟啦!飛雲!
好!上吧!陳洛鋒!

正當我勇敢的拿起手機,準備按下Fiona的電話向她表白之際,一個少女突然從暗處跑出,以閃電的速度搶去我的電話逃去。那個少女搶了我的電話,就沿斜路跑下去。我呆了一下,馬上追上去。
我邊跑邊喊﹕「搶嘢呀!」可惜現在已經晚上十一時多,這條路已經沒有行人。
只見那少女邊跑邊按我的電話,然後從商場的側門跑了進去。
我追了進去,少女沒有逃走,只是滿臉紅暈的站著喘氣,大大的眼睛表情複雜的看著我。
『嘩!靚女!』
那少女明眸皓齒,肌膚白裏透紅。黑色的秀髮盤在後腦成了一個髮髻。圓圓的臉蛋配上小巧的鼻子,令她更顯得嬌美可愛。她個子不高,但身形窈窕。雖然身穿運動套裝,但豐滿的上圍仍然撐得那件風衣脹鼓鼓的。論身材樣貌,絕對不輸給Fiona。
「你…你做咩搶我電話呀? 比…比返部電話我。」我沒想到搶劫的竟然會是個美少女,所以有點口齒不清。
少女沒有作聲,只是將我的電話遞回給我。
我呆了一呆,沒想到就這樣拿回電話。
我檢查了一下,不禁怒火中燒。所有有關Fiona的電話,通話紀錄,whatapps等等都被刪除掉了!
我大怒﹕「你做咩delete哂Fiona啲contact呀? 你係邊個? 」
少女滿臉通紅,一臉為難的看著地面,好像沒有回答的打算。
我不禁衝上前,抓著她的肩膊,直瞪她的雙眼,再次怒吼﹕「你係邊個!做咩要咁做呀? 」
少女回避著我的眼神,臉紅紅的道﹕「我…我有苦衷㗎……」然後咬一咬唇,毅然看著我道﹕「我其實係你老婆!」
「吓? …………」我充滿了疑惑。

未完待續

注意:此文章排除於CC BY-SA 4.0條款以外,版權歸原作者(羊先生)所有。
未經作者同意,任何人不得冒名、修改、重製、剽竊、抄襲、仿作、轉載文章至其他地方。